ShYU elderi uıym qyzmetin jetildirýge erekshe mán berip otyr — Nurlan Ermekbaev
ASTANA. KAZINFORM — Búgin Qazaqstan Respýblıkasy Prezıdenttik ortalyǵynda ShYU-nyń 25 jyldyǵyna arnalǵan sarapshylyq kezdesý ótti.
— 2026 jyldyń 15 maýsymynda uıymnyń jıyrma bes jyldyǵyn atap ótemiz. Bul — damýdyń jańa perspektıvalaryn ashatyn sımvoldyq máni bar kezeń. Keıinnen uıymǵa Úndistan, Pákistan, Iran jáne Belarýs elderiniń qosylýy ShYU-ny eń iri transaımaqtyq birlestikke aınaldyrdy jáne óziniń 25 jyldyq mereıtoıyna eleýli nátıjelermen keldi, — dedi ShYU bas hatshysy Nurlan Ermekbaev.
Onyń aıtýynsha, búginde ShYU ekonomıkalyq, ǵylymı-tehnıkalyq, bilim berý jáne mádenı-gýmanıtarlyq yntymaqtastyqty ilgeriletýdiń mańyzdy alańy retinde tanyldy. Sonymen qatar, ShYU keńistiginde saýda ósiminiń oń qarqynyn baıqaýǵa bolady. 2024 jyldyń qorytyndysy boıynsha ShYU-ǵa múshe memleketter arasyndaǵy taýar aınalymy 7 paıyzǵa ósip, 700 mlrd AQSh dollaryna jýyqtady.
— Qazaqstan Respýblıkasynyń Shanhaı yntymaqtastyq uıymyndaǵy róli týraly aıtqym keledi. Qazaqstan ShYU-nyń negizin qalaýshy alty memlekettiń biri jáne uıymǵa mańyzdy úlesin qosyp keledi. Qazaqstannyń 2023–2024 jyldardaǵy ShYU-ǵa tóraǵalyǵy sol kezeńdegi mańyzdy saıası oqıǵalarǵa qatysty uıymnyń ortaq ustanymyn qalyptastyrý boıynsha jedel is-qımyldarmen erekshelendi, — dedi ShYU bas hatshysy.
2024 jylǵy Astana sammıti aıasynda alǵash ret ShYU plıýs formatynda múshe memleketter basshylarynyń, baıqaýshylardyń, sondaı-aq Ázerbaıjan, Qatar, BAÁ, Túrkııa jáne Túrikmenstannan kelgen qonaqtardyń, BUU Bas hatshysynyń, halyqaralyq uıymdardyń atqarýshy organdary basshylarynyń qatysýymen kezdesý ótti. Sammıt qorytyndysy boıynsha Astana deklaratsııasy jáne 20-ǵa jýyq sheshim qabyldandy.
— Astana sammıtinde Memleket basshylary Syrtqy ister mınıstrleri keńesiniń uıym qyzmetin jetildirý jónindegi usynysyn maquldady. Búginde taraptar osy máselemen aınalysyp jatyr. Atap aıtqanda, ShYU-nyń ujymdyq bastamalary jyl saıyn halyqaralyq arenada nazar aýdartyp otyr. Sonymen birge ShYU jumysyndaǵy kemshilikterdi de kórip otyrmyz. Osyǵan oraı, Memleket basshylary alǵa qoıǵan birinshi kezektegi mindet — uıym qyzmetin jan-jaqty jańǵyrtý, — dedi Nurlan Ermekbaev.
Eske salsaq, 2024 jyly Memleket basshysy Qasym-Jomart Toqaev «ShYU plıýs» sammıtinde sóz sóıledi.
Aıta keteıik, 2025 jyly ShYU-daǵy tóraǵalyqty Qyrǵyzstan aldy.
Jaqynda Qyrǵyzstan Ulttyq banki 2026 jylǵy 11 mamyrdan bastap «Shanhaı yntymaqtastyq uıymy — 25 jyl» atty kúmis kollektsııalyq monetany aınalymǵa shyǵardy.
