ShYU elderi Izraıldiń Iranǵa jasaǵan áskerı shabýylyn qatań aıyptady
ASTANA. KAZINFORM - Shanhaı yntymaqtastyq uıymyna (ShYU) múshe memleketter Izraıldiń Iran Islam Respýblıkasynyń aýmaǵyna jasaǵan áskerı soqqysyn qatań aıyptady. Bul týraly uıymnyń baspasóz qyzmeti málimdedi.
— Shanhaı Yntymaqtastyq Uıymyna (ShYU) múshe memleketter Taıaý Shyǵystaǵy shıelenistiń kúsheıýine eleýli alańdaýshylyq bildiredi jáne Izraıldiń 2025 jylǵy 13 maýsymda Iran Islam Respýblıkasynyń terrıtorııasyna jasaǵan áskerı soqqysyn qatań aıyptaıdy.
Beıbit turǵyndardyń ólimine ákelgen azamattyq obektilerge, sonyń ishinde ıadrolyq-energetıkalyq ınfraqurylymǵa qarsy osyndaı agressıvti áreketter Birikken Ulttar uıymynyń (BUU) halyqaralyq quqyǵy men jarǵysynyń qaǵıdattary men normalaryn óreskel buzý, Irannyń egemendigine qol suǵý bolyp tabylady.
Olar aımaqtyq jáne halyqaralyq qaýipsizdikke nuqsan keltiredi jáne jahandyq beıbitshilik pen turaqtylyq úshin aýyr zardaptarǵa toly. ShYU-ǵa múshe elder Irannyń ıadrolyq baǵdarlamasy tóńiregindegi jaǵdaıdy tek beıbit, saıası jáne dıplomatııalyq jolmen retteýdi tabandy túrde qoldaıdy.
ShYU-ǵa múshe elder Iran Islam Respýblıkasynyń halqy men úkimetine shyn júrekten kóńil aıtady.
ShYU-ǵa múshe memleketter BUU Jarǵysynyń jáne ShYU Jarǵysynyń maqsattary men qaǵıdattaryn qatań saqtaı otyryp, ShYU-ǵa múshe memleketterge qarsy baǵyttalǵan kez kelgen zańsyz áreketterge jol berýge bolmaıdy dep sanaıdy jáne halyqaralyq beıbitshilik pen qaýipsizdikti nyǵaıtýǵa degen myzǵymas ustanymdaryn rastaıdy, - delingen habarlamada.
Eske sala keteıik, juma, 13 maýsymǵa qaraǵan túni Izraıl Iranǵa jappaı soqqy berdi. Buǵan jaýap retinde Tegeran Izraılge qaraı júzden astam dron ushyrdy. Iran Natanzedegi ıadrolyq qondyrǵynyń zaqymdanǵanyn rastady, biraq radıatsııanyń aǵyp ketkenin joqqa shyǵardy.
Iran Izraılge zymyran soqqylarynyń jańa tolqynyn bastady. Izraıldiń Tótenshe jaǵdaılar qyzmeti habarlaǵandaı, ırandyq zymyran atysynan eki adam qaza tapty – shamamen 60 jastaǵy áıel jáne 45 jastaǵy er adam. Taǵy 19 adam jaraqat aldy, dep habarlady Izraıldiń jedel járdem qyzmeti.
Irannyń BUU-daǵy ókili Izraıldiń áýe shabýyly saldarynan 78 adamnyń qaza tapqanyn aıtqan bolatyn. Iranda 320-dan astam adam jaraqat aldy.
Buǵan deıin Iran joǵary shendi áskerı qolbasshylar men jetekshi ǵalymdardyń Izraıl soqqysy saldarynan qaza tapqanyn rastady.
Iran Izraıl shabýylynan keıin Ormýz buǵazyn jabaıyn dep jatyr.
Iran-AQSh kelissózderine deldal bolyp júrgen Oman Syrtqy ister mınıstri Badr ál-Býsaıdı jeksenbi kúni Maskatta ótýi josparlanǵan kelissóz ótpeıtinin rastady.
Izraıl Iranǵa taǵy soqqy jasap jatyr.
Eýroodaq Izraıl-Iran qaqtyǵysyna qatysty málimdeme jasady.