ShYU elderi aqparattyq saladaǵy yntymaqtastyqty kúsheıtýge nıetti
ASTANA. KAZINFORM –Qyrǵyzstan astanasy Bishkekte ótken Shanhaı yntymaqtastyq uıymy (ShYU) aıasyndaǵy buqaralyq aqparat quraldary jáne saraptamalyq ortalyqtar sammıtiniń negizgi qorytyndylarynyń biri – BAQ pen saraptamalyq ortalyqtar arasyndaǵy yntymaqtastyqty keńeıtý, ortaq aqparattyq keńistikti damytý jáne jalǵan aqparattyń taralýyna qarsy birlesken is-qımyldy kúsheıtý boldy.
Atalǵan sammıt Qyrǵyzstannyń ShYU-ǵa tóraǵalyǵy aıasynda Bishkektegi «Ala-Archa» memlekettik rezıdentsııasynda ótti.
Іs-sharaǵa ShYU-ǵa múshe memleketter, baqylaýshy elder men dıalog jónindegi seriktes memleketterdi qosa alǵanda, 26 elden jetekshi buqaralyq aqparat quraldarynyń, saraptamalyq ortalyqtardyń, memlekettik organdar men halyqaralyq uıymdardyń 250-ge jýyq ókili qatysty. Sammıtti Qyrǵyz ulttyq «Kabar» aqparat agenttigi men Qytaıdyń «Sınhýa» aqparat agenttigi birlesip uıymdastyrdy.
Sammıttiń negizgi taqyryby – «Jańa dáýirdegi ShYU: ózara túsinistikten praktıkalyq yntymaqtastyqqa» boldy. Plenarlyq otyrystar barysynda qatysýshylar Uıymnyń ortaq aqparattyq keńistigin damytý, onyń qyzmetin sapaly saraptamalyq turǵydan súıemeldeýdi jetildirý, jalǵan aqparattyń taralýyna qarsy is-qımyldy kúsheıtý, sondaı-aq múshe memleketter arasyndaǵy gýmanıtarlyq baılanystardy nyǵaıtý máselelerin talqylady.
Sammıtke qatysýshylar qazirgi medıakeńistikte jedeldik, obektıvtilik jáne tereń taldaý basty talaptardyń biri ekenin atap ótti. Olardyń pikirinshe, sapaly jýrnalıstıka memleketter arasyndaǵy ózara senimdi nyǵaıtyp, óńirde júzege asyrylyp jatqan iri ınfraqurylymdyq, kólik jáne ınvestıtsııalyq jobalardyń mańyzyn qoǵamǵa keńinen jetkizýge yqpal etedi.
ShYU Hatshylyǵynyń ókili uıymnyń jahandyq aqparattyq keńistiktegi ustanymyn nyǵaıtýǵa erekshe mán beriletinin aıtty. Onyń aıtýynsha, Uıym qyzmeti resmı ınternet-resýrsy men áleýmettik jelilerdegi resmı paraqshalary arqyly jan-jaqty aqparattyq turǵydan súıemeldenip keledi.
Sammıt qorytyndysy buqaralyq aqparat quraldary ókilderi men sarapshylar qaýymdastyǵy arasyndaǵy turaqty dıalogtyń mańyzyn taǵy bir márte aıqyndady. Qatysýshylar praktıkalyq yntymaqtastyqty keńeıtýge, kásibı baılanystardy nyǵaıtýǵa jáne ádiletti, ashyq ári kóppolıarly halyqaralyq aqparattyq keńistikti qalyptastyrýǵa birlesip yqpal etýge daıyn ekenderin jetkizdi.
Aıta keteıik, bul is-shara Qyrǵyzstannyń tóraǵalyǵymen 2026 jylǵy 31 tamyz - 1 qyrkúıekte Bishkekte ótetin ShYU-ǵa múshe memleketter basshylary keńesiniń otyrysyna daıyndyq aıasyndaǵy mańyzdy kezeńderdiń biri sanalady.
Buǵan deıin ShYU 25 jylda álemdegi eń iri transóńirlik uıymdardyń birine aınalǵanyn jazǵanbyz.
