ShYU Damý banki qurylýy múmkin: Qazaqstan qarjy júıesin tsıfrlandyrý tájirıbesin tanystyrdy
ASTANA. KAZINFORM - Taıaýda Bishkekte Shanhaı yntymaqtastyq uıymynyń is-sharalary ótti. Onyń sheńberinde ShYU Damý bankin qurý, múshe memleketterdiń qarjylyq ózara is-qımylyn keńeıtý jáne kópjaqty yntymaqtastyq tetikterin jetildirý máseleleri talqylandy.
Bul basqosýǵa Qazaqstan atynan QR Qarjy vıtse-mınıstri Dáýren Keńbeıl qatysty. Qatysýshylar bolashaq qarjy ınstıtýtyn qalyptastyrý, sondaı-aq qarjy salasyn qarjylandyrý men tsıfrlandyrýdyń zamanaýı quraldaryn damytý máselelerine erekshe nazar aýdardy.
Atap aıtqanda, ShYU Damý bankin qurý máselesine arnalǵan úshinshi konsýltatıvti kezdesý ótip, onyń barysynda Dáýren Maratuly táýeldi qarjylandyrý, jergilikti valıýtalar men balama quraldardy paıdalaný arqyly jarǵylyq kapıtaldy qalyptastyrý, sondaı-aq shtab-páterdi ornalastyrý baǵytynda talaptardy aıqyndaýdyń mańyzdylyǵyn atap ótti.
Óz kezeginde qatysýshylar ShYU Damý bankin qurýdyń mán-mańyzdylyǵy men kópjaqty konsýltatsııalyq protsesti ilgeriletýge beıil ekenderin taǵy da rastady.
Budan bólek ShYU-ǵa múshe memleketterdiń Qarjy mınıstrleri men ortalyq bank basshylarynyń kezdesýi de ótkenin aıta keteıik. Onyń barysynda qarjylyq ózara is-qımyldy keńeıtý men yntymaqtastyqtyń jańa tetikterin qalyptastyrý máseleleri qaraldy.
Sonymen birge basqosýda zamanaýı halyqaralyq qarjy júıesiniń, sondaı-aq memlekettik qarjyny tsıfrlandyrýdyń ózekti máselelerine erekshe nazar aýdaryldy.
Osy oraıda D.Keńbeıl tehnologııalyq turǵyda derbes ári ınnovatsııalyq memleket modeline kóshýge Qazaqstannyń qarjy júıesin damytýdaǵy negizgi baǵyttaryn tanystyrdy. Ásirese memlekettik qarjy júıesin tsıfrlandyrý men tuńǵysh ret Qytaı qor naryǵyna panda-oblıgatsııalarynyń sátti shyǵarylymyna erekshe nazar aýdaryldy.
Kezdesýdiń qorytyndysyna sáıkes uıymǵa kiretin memleketterdiń ókilderi seriktestikti odan ári damytyp, ózara tıimdi maqsattarǵa birlesip qol jetkizýge múddeli ekenderin jetkizdi.
Osyǵan deıin ShYU-ǵa múshe memleketterdiń ǵylym jáne tehnologııa mınıstrlikteriniń basshylary Qyrǵyzstanda bas qosqan bolatyn.
