ShYU baıqaýshylary referendýmnyń qalaı ótip jatqanyn baǵalady

ASTANA. KAZINFORM – Shanhaı yntymaqtastyq uıymynyń baıqaýshylar mıssııasynda 13 baıqaýshy referendýmnyń ótý barysyn baqylaýda. Bul týraly mıssııa basshysy, ShYU bas hatshysynyń orynbasary Oleg Kopylov aıtyp berdi.

«Biz Qazaqstannyń Syrtqy ister mınıstrliginiń shaqyrýymen Astanaǵa keldik jáne Qazaqstanda AES salý máselesi boıynsha respýblıkalyq referendým ótkizýge daıyndyq barysyna monıtorıng júrgizdik. Halyqaralyq baıqaýshylardyń shaqyrylýyn Astananyń referendýmnyń barynsha ashyqtyǵyn, ashyqtyǵyn jáne demokratııalyǵyn qamtamasyz etýge umtylysy retinde baǵalaımyz. Bizdiń mıssııamyzda 13 baqylaýshy akkredıttelgen. Onda saılaý, zań shyǵarýshy organdardyń ókilderi, ShYU-ǵa múshe memleketterdiń dıplomatııalyq qyzmetkerleri, sondaı-aq ShYU hatshylyǵynyń laýazymdy tulǵalary bar», - dedi O. Kopylov Astanada Halyqaralyq baıqaýshylarǵa qolǵabys kórsetý ortalyǵynda ótken brıfıngte.

Onyń aıtýynsha, ShYU mıssııasy prezıdenttik jáne parlamenttik saılaýda, sondaı-aq referendýmdarda ShYU baıqaýshylar mıssııasy týraly erejeni basshylyqqa alyp, Qazaqstan Respýblıkasynyń ulttyq zańnamalaryna sáıkes, memleket isin jańartýda saıası beıtaraptyq, obektıvtilik jáne aralaspaý qaǵıdatyn saqtaı otyryp, óz fýnktsııalaryn oryndaıdy.

Referendým qarsańynda mıssııa músheleri daıyndyqty baǵalaý úshin Astana men Aqmola oblysynda ornalasqan birqatar ýchaskelik referendým komıssııalaryna barǵan.

«Qabyldaýshy tarap daýys berý protsesin monıtorıngteý, daýys berýge daıyndyq pen ótkizý úshin barlyq qajetti jaǵdaı jasaǵanyn atap ótkim keledi. Tolyqqandy aqparat berilgen. Jalpy, eshqandaı shaǵym joq. Referendým azamattyq qoǵam ókilderiniń belsendi qatysýymen jáne sanaly tańdaý jasaýy úshin barynsha qolaıly jaǵdaılar jasaýymen ashyqtyq atmosferasynda ótip jatqanyn aıtqymyz keledi. Respýblıkalyq referendým qoldanystaǵy zańnamaǵa jáne Qazaqstan Respýblıkasynda qabyldanǵan halyqaralyq mindettemelerge sáıkes ótip jatyr», - dedi mıssııa basshysy.

Eske salaıyq, búgin qazaqstandyqtar atom elektr stantsııasyn salý máselesi boıynsha jalpyulttyq referendýmda daýys berip jatyr.

Respýblıkalyq referendým bıýlleteninde bir ǵana saýal bolady:
— Siz Qazaqstanda atom elektr stantsııasyn salýǵa kelisesiz be?

Daýys berýshi jaýaptyń eki nusqasynyń birin tańdaıdy:
— «Iá, kelisemin» nemese, «Joq, kelispeımin».

Aıta keteıik, saǵat 14:00–degi jaǵdaı boıynsha 6 339 425 azamat bıýlleten aldy. Bul tizimge engizilgen azamattardyń 51,77 paıyzyn quraıdy.