ShYU baıqaýshylar mıssııasy Quryltaı saılaýyn demokratııalyq ári ashyq ótti dep baǵalady
ASTANA. KAZINFORM – Shanhaı yntymaqtastyq uıymy (ShYU) QR Syrtqy ister mınıstrliginiń shaqyrýymen ótken Quryltaı saılaýyna daıyndyq jáne ony ótkizý barysyna halyqaralyq baıqaý júrgizdi. ShYU Bas hatshysynyń orynbasary T.R.Mıdhýn baıqaýshylar mıssııasynyń jumys qorytyndysyn jarııalady.
Onyń aıtýynsha, halyqaralyq baıqaýshylardy shaqyrý Qazaqstannyń Quryltaı depýtattarynyń saılaýyn barynsha ashyq ári jarııa ótkizýge umtylysyn kórsetedi.
Mıssııa quramyna ShYU-ǵa múshe alty memleketten 17 baıqaýshy kirdi. Olardyń arasynda zań shyǵarýshy, atqarýshy jáne saılaý organdarynyń tájirıbeli ókilderi boldy. Mıssııanyń baıqaý jumysy obektıvtilik, saıası beıtaraptyq, ashyqtyq jáne jarııalylyq qaǵıdattaryna negizdeldi.
Sonymen qatar baıqaýshylar memlekettiń egemendigin qurmetteý, ishki isterine aralaspaý, baıqaý nátıjeleriniń dáldigin qamtamasyz etý jáne qorytyndy ázirleý kezinde kásibı tásildi basshylyqqa aldy.
– ShYU mıssııasynyń jumysy saılaý nátıjelerine emes, daýys berý protsesine baǵyttaldy. Bul rette saılaý protsesiniń zańdylyǵy men onyń nátıjelerine degen senimge qatysty túpkilikti sheshimdi halyqaralyq baıqaýshylar emes, el halqy qabyldaıtynyn negizge aldyq, – dedi T.R.Mıdhýn.
Sonymen qatar ol Qazaqstandaǵy daýys berý protsesi týraly barynsha tolyq túsinik qalyptastyrý maqsatynda mıssııa músheleri Astana qalasy men Aqmola oblysyndaǵy saılaý ýchaskelerinde baıqaý júrgizip, saılaýǵa deıingi jáne daýys berý kúnderi mıssııa ókilderi barlyǵy 102 ýchaskege barǵanyn aıtty.
– Baıqaýshylar saılaý ýchaskelerin saılaý jáne atqarýshy organdarmen aldyn ala kelisýsiz aralady. Árbir ýchaskeni baıqaýshylar ózderi derbes tańdady, – dedi ol.
Mıssııa saılaýshylardyń azamattyq belsendiliginiń joǵary bolǵanyn jáne ýchaskelik saılaý komıssııalary qyzmetkerleriniń Quryltaı depýtattarynyń saılaýyn uıymdastyrý men ótkizý barysynda kásibı deńgeı tanytqanyn atap ótti. Ýchaskelik komıssııalar saılaý protsesin ótkizý úshin barlyq qajetti jaǵdaıdy qamtamasyz etti.
Komıssııa músheleri azamattarmen jáne baıqaýshylarmen kásibı ári izgi nıetpen qarym-qatynas jasap, óz qyzmetin bilikti, jarııa, ashyq jáne táýelsiz túrde júzege asyrdy.
Mıssııanyń qorytyndysyna sáıkes, Quryltaı depýtattarynyń saılaýy eldiń saılaý zańnamasynyń talaptaryna jáne Qazaqstan qabyldaǵan halyqaralyq mindettemelerge sáıkes ótti.
– Mıssııa ulttyq zańnama normalarynyń buzylǵanyn tirkegen joq. Mundaı buzýshylyqtar saılaýdyń zańdylyǵyna kúmán keltirýge nemese onyń nátıjelerine áser etýge negiz bola almaıdy, – dedi ShYU Bas hatshysynyń orynbasary.
Spıker sóz sońynda ShYU baıqaýshylar mıssııasy Quryltaı depýtattarynyń ótken saılaýyn ashyq, senimdi ári demokratııalyq sıpatta ótti dep tanydy dep atap ótti.
Aıta keteıik, OSK Quryltaı depýtattary saılaýynyń nátıjesin jarııa etti.
