ShYU bas hatshysynyń rólin kúsheıtý ne úshin qajet – sarapshy pikiri

ASTANA. KAZINFORM – Qazaqstan qoǵamdyq damý ınstıtýtynyń sarapshysy Aınur Abaıqyzy Shanhaı Yntymaqtastyq Uıymy  bas hatshysynyń rólin kúsheıtý ne úshin qajet ekenin aıtty.

ShYU Astana sammıtinde Prezıdent Qasym-Jomart Toqaev Qazaqstan uıym bas hatshysynyń rólin kúsheıtýdi quptaıtynyn aıtqan edi. Sarapshy Aınur Abaıqyzy bul usynystyń mánin bylaısha túsindirdi.

«ShYU bas hatshysynyń rólin kúsheıtý óte mańyzdy. Óıtkeni uıymǵa múshe elderdiń sany artyp jatyr. ShYU geografııasynyń keńeıýine baılanysty, aınalysatyn taqyryptarynyń kóbeıýine baılanysty, uıymnyń áleýetin kóterý úshin qurylymdyq deńgeıde jańǵyrtýdan ótý kerektigi kóp aıtylyp júr. Sondyqtan bul uıym ári qaraı jemisti jumys isteý úshin, rólin kúsheıtý úshin, qyzmetin jetildirý úshin Bas hatshynyń rólin keńeıtý qısyndy bolady», - deıdi ol.

Qazaqstan qoǵamdyq damý ınstıtýtynyń sarapshysy Astana sammıtiniń nátıjesinde ShYU strategııalyq damýynyń 2035 jylǵa deıingi strategııasy qabyldanyp jatqanyn eske saldy.

«Sonyń aıasynda bas hatshynyń rólin kúsheıtý óte mańyzdy bolyp otyr. Onyń ústine mundaı qadaı uıymnyń ınstıtýtsıonaldyq turǵydaǵy áleýetin arttyrýǵa septigin tıgizedi», - dedi Aınur Abaıqyzy.