ShYU Aımaqtyq antıterrorlyq qurylymynyń 2030 jylǵa deıingi jospary maquldandy
TAShKENT. KAZINFORM – Tashkentte Shanhaı Yntymaqtastyq Uıymy Aımaqtyq antıterrorlyq qurylymynyń 43-shi otyrysy ótti, dep habarlaıdy Kazinform agenttiginiń menshikti tilshisi.
Otyrystyń negizgi bóligi jabyq formatta ótti. Oǵan ShYU Bas hatshysy Nurlan Ermekbaev jáne uıymǵa múshe elderdiń ókilderi qatysty. Onyń barysynda taraptar yntymaqtastyqty tereńdetý máselelerin talqylap, Aımaqtyq antıterrorlyq qurylymynyń byltyrǵy jumysyn qorytyndylady.
Delegattar shaǵyn quramda ótken kelissózden keıin tıisti qujattarǵa qol qoıdy. Atap aıtqanda, ShYU Aımaqtyq antıterrorlyq qurylymynyń 2026-2030 jyldarǵa arnalǵan yntymaqtastyq jospary maquldandy.
Sondaı-aq aldaǵy ýaqytta uıymdastyrylatyn is-sharalardyń jospary bekitildi. Oǵan saı, ShYU-nyń Terrorızm men ekstremızmge qarsy kúres boıynsha 11-shi halyqaralyq konferentsııasy Ózbekstanda ótedi.
Buǵan qosa, uıymǵa múshe memleketterdiń terrorızmge qarsy birlesken oqý-jattyǵýlary Belarýste uıymdastyrylady.
Al, Qyrǵyzstanda ShYU elderiniń shekara qyzmetteri basshylarynyń 11-shi otyrysy ótedi.
Eske salaıyq, taıaýda Qytaı tarapy Tashkentte ótken dóńgelek ústel barysynda ShYU-ǵa tóraǵalyq etý kezeńinde atqaratyn jumystardyń josparymen bólisken edi. Resmı Beıjiń uıym aıasyndaǵy yntymaqtastyqty 8 baǵyt boıynsha ilgeriletpek.
Byltyr shildede Astanada ótken ShYU sammıti barysynda 25 qujatqa qol qoıyldy. Kóptegen álem elderi Qazaqstannyń uıymǵa tóraǵalyǵyn joǵary baǵalady. Elimizdiń bastamalary uıymnyń jumysyna serpin berdi.
Sonymen qatar, taıaýda Túrkııa ShYU-nyń tolyq múshesi atanýǵa nıetti ekenin málimdedi.