ShYU aıasynda Araldyń qurǵaǵan tabanyna orman egetin ortalyq qurylady
ASTANA. KAZINFORM – Astanada Shanhaı yntymaqtastyǵy uıymyna múshe memleketteriniń qorshaǵan ortany qorǵaý máselelerine jaýapty mınıstrleri men vedomstvo basshylary besinshi ret bas qosty.
Jıynǵa ShYU Bas hatshysy Chjan Mın myrza, Úndistan, Iran, Qytaı, Qyrǵyzstan, Pákistan, Reseı, Tájikstan, Ózbekstan jáne Belarýs delegatsııalary qatysýda.
«Ekologııalyq problemalarda shekara bolmaıdy jáne Shanhaı yntymaqtastyq uıymynyń barlyq elderinde uqsas ekologııalyq problemalar bar, olardy tek kúsh biriktirý arqyly birlesip sheshý qajet. Búgingi keńeste biz ekologııalyq máselelerdi sheshýde, klımattyń ózgerýinde, parnıktik gaz shyǵaryndylaryn azaıtýda, qaldyqtardy tıimdi basqarý men erekshe qorǵalatyn tabıǵı aýmaqtar salasyndaǵy yntymaqtastyqty damytýda birlesken is-qımyldar jasaýǵa baǵyttalǵan máselelerdi qarastyrdyq», - dedi Qazaqstannyń Ekologııa jáne tabıǵı resýrstar mınıstri Erlan Nysanbaev.
Sonymen birge, bul jıynda ShYU elderiniń qorshaǵan ortany qorǵaý máselelerine jaýapty mınıstrlikteri men vedomstvolary basshylarynyń 5-otyrysynyń hattamasyna qol qoıyldy.
Delegatsııa basshylary 2024 jyly Shanhaı yntymaqtastyq uıymynyń Ekologııa jylyn ótkizý jónindegi is-sharalar josparyn odan ári ilgeriletýdiń mańyzdylyǵy men qajettigin atap ótti.
ShYU-ǵa múshe memleketterdiń úkimetteri arasynda qorshaǵan ortany qorǵaý salasyndaǵy yntymaqtastyq týraly kelisim jáne 3-4 shildede Astanada ótetin ShYU memleket basshylary keńesinde jarııalanatyn qaldyqtardy tıimdi basqarý týraly málimdemesi maquldandy jáne oǵan qol qoıý usynyldy.
«ShYU-ǵa múshe elderdiń jasandy orman qurýdaǵy, tozǵan aýmaqtardy ormandandyrýdaǵy orasan zor tájirıbesin eskere otyryp, biz búgin Araldyń qurǵaǵan tabanyn jáne shóleıt aımaqtardy ormandandyrý jónindegi halyqaralyq ortalyq qurýdy usyndyq. Bul máselede bizdi Ortalyq Azııa elderinen kelgen áriptesterimiz qoldady. Bolashaqta osy ıdeıamyzdy alǵa jyljytamyz dep oılaımyn», - dedi E. Nysanbaev.
ShYU-ǵa múshe elderdiń ekologııalyq problemalardy sheshý jónindegi birlesken tásilderi, ShYU 2024-2026 jyldarǵa arnalǵan «Jasyl beldeý» baǵdarlamasyn iske asyrý jónindegi birlesken is-qımyl jospary bekitildi.
Sondaı-aq, ShYU-ǵa múshe memleketterdiń qorshaǵan ortany qorǵaý salasyndaǵy yntymaqtastyǵynyń 2025-2027 jyldarǵa arnalǵan tujyrymdamasyn iske asyrý jospary bekitildi.
