ShYU 25 jylda álemdegi eń iri transóńirlik uıymdardyń birine aınaldy
ASTANA. KAZINFORM – Qytaı astanasy Beıjiń qalasynda Shanhaı yntymaqtastyq uıymynyń qurylǵanyna 25 jyl tolýyna arnalǵan saltanatty qabyldaý ótti, dep habarlaıdy Kazinform agenttiginiń menshikti tilshisi.
Іs-shara barysynda sóz sóılegen ShYU Bas hatshysy Nurlan Ermekbaev uıymnyń mereıtoıy múshe memleketterdiń ondaǵan jyl boıǵy júıeli jumysy men bolashaqqa umtylysyn aıshyqtaıtynyn aıtty.
«Shanhaı bestiginen» bastaý alǵan uıym búginde álemdegi eń iri transóńirlik birlestikterdiń birine aınaldy. Uıymnyń barlyq qyzmeti «Shanhaı rýhynyń» qaǵıdattaryna negizdelgen. Bul óz kezeginde múshe memleketterdiń ózara senim men qurmet negizinde ortaq sheshimder qabyldap, alǵa jyljýyna múmkindik berip keledi», – dedi Nurlan Ermekbaev.
Qytaı úkimeti atynan sóz sóılegen QHR Syrtqy ister mınıstri Van I ShYU Bas hatshysyn, uıymǵa múshe memleketterdiń elshilerin quttyqtap, uıymnyń damýyna qoldaý kórsetip otyrǵan halyqaralyq seriktesterge alǵys bildirdi.
«Qytaı ShYU-ny kórshiles memlekettermen qarym-qatynas ornatýdaǵy basym baǵyttardyń biri retinde qarastyrady. Biz yntymaqtastyq pen ózara tıimdilik jolynda ShYU elderimen múmkindikterimizdi bólisýge daıynbyz», – dedi Qytaı syrtqy saıası vedomstvosynyń basshysy.
Kazinform tilshisine bergen suhbatynda ShYU Bas hatshysynyń orynbasary Oleg Kopylov uıym úshin 25 jyldyq kezeńniń mańyzdy beles bolǵanyn atap ótti.
«Shırek ǵasyr ishinde ShYU aýmaǵy men halqynyń sany boıynsha álemdegi eń iri transóńirlik birlestikke aınaldy. Qazirgi ýaqytta uıym aıasynda 29 mınıstrlik tetik jumys isteıdi jáne yntymaqtastyq barlyq negizgi salalardy qamtıdy», – dedi ol.
Oleg Kopylovtyń aıtýynsha, Qytaı tóraǵalyǵy kezinde qalyptasqan ornyqty damý baǵyty qazirgi tóraǵa Qyrǵyzstan kezinde de jalǵasyn taýyp otyr. Bul basymdyqtar aldaǵy Pákistan tóraǵalyǵy kezeńinde de saqtalady.
Qabyldaý aıasynda qonaqtarǵa mádenı baǵdarlama usynyldy. Balalar ujymy óner kórsetip, qytaılyq robototehnıka jetistikteri tanystyryldy. Sonymen qatar tarıhı fotokórme men agrarlyq tehnologııalar jónindegi ShYU demonstratsııalyq bazasynyń arnaıy stendi uıymdastyryldy.
Aıta keteıik, buǵan deıin ShYU elderi uıym qyzmetin jetildirýge erekshe mán berip otyrǵany habarlanǵan bolatyn.
