Shyrsha bezendiremin dep jaraqat alǵan muǵalimge qansha áleýmettik kómek berilgeni aıtyldy

ASTANA. KAZINFORM — Eńbek jáne halyqty áleýmettik qorǵaý mınıstrligi Semeıde shyrsha bezendirý kezinde bıikten qulap, jaraqat alǵan Qýat Aıtqalıevke qandaı áleýmettik kómek tólenip jatqanyn málim etti.

— Abaı oblysy bilim basqarmasynyń Semeı qalasy bilim bóliminiń № 49 jalpy orta bilim beretin mektebiniń jumyskeri Qýat Aıtqalıev 12 jeltoqsanda 352 767 teńge tolyq jalaqysyn aldy. 21 jeltoqsanda bolǵan jazataıym oqıǵadan keıin jumysker Q.Aıtqalıevke mekteptiń bastaýysh Kásipodaq uıymy tarapynan 50 myń teńge aqshalaı kómek kórsetildi, — dep jazylǵan Kazinform saýalyna joldanǵan málimette.

Resmı málimetten ázirge muǵalimniń aılyǵy júrip jatqanyn ańǵarýǵa bolady.

— Osy qańtar aıynda jumyskerge 100% eńbekaqysy 369 893 teńge kóleminde beriledi. Onymen qosa Abaı oblysynyń bilim basqarmasy men Qazaqstandyq oqý-aǵartý, ǵylym jáne joǵary bilim qyzmetkerleriniń salalyq kásiptik odaǵyna qarasty Abaı oblysynyń kásipodaq uıymy arasyndaǵy áleýmettik áriptestik týraly kelisim shart negizinde 10 kúnnen astam statsıonarlyq nemese ambýlatorııalyq emdeý shyǵyndaryna 15 AEK (59 980 teńge) kóleminde tólenedi. Sondaı-aq, densaýlyǵyna baılanysty eńbekke ýaqytsha jaramsyzdyq kezeńinde 100% jalaqysy tólenip otyrady, — delingen mınıstrliktiń jaýabynda.

Eske salsaq, 22 jeltoqsanda semeılik muǵalim shyrsha bezendirý kezinde aýyr jaraqat alǵany belgili boldy.

Premer-mınıstrdiń orynbasary Tamara Dúısenova Úkimet otyrysynan keıin ótken baspasóz máslıhatynda osy máselege baılanysty pikir bildirgen bolatyn.