Shirkeýdiń sadaqa jáshigindegi aqshany jymqyrǵan aqmolalyq ustaldy
KÓKShETAÝ. QazAqparat - Aqmola oblysynyń turǵyny shirkeýdegi sadaqa jáshigindegi aqshany jymqyryp ketti, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, sáýirdiń 28-de Shortandy aýdandyq PB kezekshilik bólimine shirkeýdiń 29 jastaǵy qyzmetkeri habarlasyp, sáýirdiń 21-de belgisiz bireý pravoslav shirkeýininiń ishine terezeni buzý arqyly enip, qaıyrymdylyq jáshiginen 20 myń teńge aqshany jymqyryp ketkenin aıtqan.
«Osyǵan baılanysty Qylmystyq kodekstiń 188 babynyń 3 bóligi «urlyq» boıynsha is qozǵalyp, sotqa deıingi tergeý amaldary júrgizilýde», - deıdi vedomstvodan.
Anyqtalǵandaı, kúdikti retinde 43 jastaǵy jergilikti turǵyn ustaldy. Ol óziniń qylmysyn moıyndap, urlaǵan aqshany jeke muqtajyna jumsaǵanyn aıtty.
