Shırek ǵasyrdyń ishinde Golovkın sııaqty boksshyny kórgen emespin - Leffler
ASTANA. QazAqparat - WBA, IBF, IBO jáne WBC tujyrymdary boıynsha álem chempıony Gennadıı Golovkınniń (37-0, 33 KO) promoýteri Tom Leffler GGG-ge qarsylasty tabý qanshalyqty qıyn bolǵanyn aıtyp berdi, dep habarlaıdy QazAqparat tilshisi.
"Shynymen de, ol adam balasy senbeıtin joldy eńserdi. Osy jolda biraz qıynshylyqtarmen kúresýge týra keldi. Tyńǵylyqty jumys, shydamdylyq pen nokaýttar qazirgi Golovkınniń obrazyn qalyptastyrdy. Jaqynda onyń NVO arnasyna kelgenine bes jyl tolady. Áli esimde, bas kezinde men HBO men Showtime-nan Golovkın úshin jalynyp turyp, slot berýdi suraǵanmyn. Jaı, ánsheıin, jarnama bolsyn dep, ony úlken boksqa shyǵarýdy oıladyq. Bara-bara biz onyń qarsylastaryna eń úlken gonorarlardy usyna bastadyq. Alaıda bireýi de shyqqysy kelmedi. Naǵyz problema sol boldy. Álem chempıony degen birneshe ataǵy bar boksshylar da tartynshaqtap, rıngke shyqpady. Boksta júrgenime 25 jyl boldy. Biraq ondaıdy áli kórgen emespin. Men biletin boksta kez kelgen ýaqytta myqty boksshylar úzdikterge qarsy shyǵýǵa tyrysatyn", - dedi Leffler Las Vegas Review Journal basylymyna bergen suxbatynda.
Aıta keteıik, aǵymdaǵy jyly 16 qyrkúıekte Gennadıı Golovkın meksıkalyq boksshy Saýl Alvarespen judyryqtasady. Atalǵan jekpe-jek AQSh-tyń Las-Vegas qalasyndaǵy "T-Mobile Arena" sport kesheninde ótedi.
