Shırek ǵasyrdan astam ýaqyt ishinde azat elde oıy sergek, tanymy tereń jańa býyn ósip jetildi - Elbasy

ASTANA. QazAqparat - Shırek ǵasyrdan astam ýaqyt ishinde azat elde oıy sergek, tanymy tereń jańa býyn ósip jetildi. Bul týraly Qazaqstan Respýblıkasynyń Táýelsizdik kúnine arnalǵan saltanatty jıynǵa qatysqan Elbasy Nursultan Nazarbaev aıtty, dep habarlaıdy QazAqparat tilshisi.

«Táýelsizdigimiz jarııalanǵan 1991 jylǵy 16 jeltoqsan - ult shejiresinde altyn árippen jazylǵan tarıhı kún. Shırek ǵasyrdan astam ýaqyt ishinde azat elde oıy sergek, tanymy tereń jańa býyn ósip jetildi. Toqsanynshy jyldary dúnıege kelgen balalar búginde azamat bolyp, memleketti damytýǵa atsalysa bastady», - dedi Nursultan Nazarbaev.

Elbasy bul kezeńdegi jas býyn Qazaqstan, Máńgilik el uǵymdaryn jadyna jattap, túısigine toqyp óskeninen nazar aýdartty.

«Jýyrda jarııalanǵan «Uly dalanyń jeti qyry» atty maqalamda álemdik órkenıetke qosqan úlesimizdi keńinen atap kórsettim. Jas urpaqty patrıottyq rýhta tárbıeleý arqyly el egemendigin baıandy ete alamyz. Sonda ǵana keleshek urpaǵymyzdyń rýhy bıik bolyp, jan dúnıesi jańarady. Ulttyq kod pen rýhanı jańǵyrýdyń bir qyry osynda dep bilemin. Qazaqstannyń birtutastyǵy, ultymyz ben jurtymyzdyń tereń mádenıeti bedelimizdi bıiktete túsedi», - dedi QR Prezıdenti.