Shıpajaıda emdelý: memleket qandaı qoldaý kórsetedi
ASTANA. KAZINFORM — Shıpajaıda emdelý — múgedektigi bar adamdarǵa kórsetiletin áleýmettik qoldaýdyń bir túri. Bul qyzmet memleket qarjysy esebinen tegin beriledi. Negizgi maqsat densaýlyqty nyǵaıtýǵa, aǵza qyzmetin jaqsartýǵa jáne adamnyń ómir súrý sapasyn arttyrýǵa baǵyttalǵan.
Em alý múmkindigi adamnyń densaýlyq jaǵdaıyna jáne medıtsınalyq kórsetkishterine qaraı anyqtalady. Bul qyzmet múgedektigi bar adamnyń jeke ońaltý baǵdarlamasyna engiziledi. Osydan keıin azamat ózine qolaıly jerdi Áleýmettik qyzmetter portalynan ózi tańdaı alady.
Portalda qyzmet alýshy shıpajaıda em kórsetetin uıymdar týraly aqparatpen tanysa alady. Ár uıymnyń qandaı jaǵdaı usynatynyn kórip, ózine qolaıly nusqany tańdaıdy.
Memleket shıpajaıda emdelý aqysyn belgilengen soma sheginde tóleıdi. Eger tańdalǵan qyzmettiń quny osy somadan aspasa, azamat emdi tegin alady. Al baǵasy belgilengen somadan joǵary shıpajaıdy tańdaǵan jaǵdaıda, aıyrmasyn azamattyń ózi tóleýine bolady.
— Shıpajaıda emdelý — ońaltý júıesiniń mańyzdy bóligi. Áleýmettik qyzmetter portalynyń kómegimen bul qyzmetti alý tártibi adamdar úshin túsinikti ári yńǵaıly bola tústi. Azamat shıpajaıdy ózi tańdaıdy, al memleket emdelý qunyn belgilengen qarajat mólsherine deıin tóleıdi. Bul qyzmet alýshynyń jeke qajettiligin eskerýge jáne kórsetiletin qyzmettiń sapasyn arttyrýǵa múmkindik beredi, — dedi QR Eńbek jáne halyqty áleýmettik qorǵaý mınıstrliginiń Áleýmettik qorǵaý salasyndaǵy retteý jáne baqylaý komıtetiniń tóraǵasy Ilıa Skýb.
Portalda sanatorıılerge qoıylatyn belgili bir talaptar qarastyrylǵan. Sonyń biri — múgedektigi bar adamdar úshin qoljetimdi jaǵdaı jasaý. Adamnyń ǵımarat ishinde erkin ári kedergisiz qozǵalýyna qajetti jaǵdaılar jasalýǵa tıis. Onyń ishinde pandýstar, múgedektigi bar adamdarǵa beıimdelgen bólmeler men sanıtarlyq oryndar jáne basqa da qajetti jaǵdaılar bolýy kerek.
Medıtsınalyq kórsetkishterine qaraı shıpajaıda ártúrli emdeý jáne saýyqtyrý sharalary júrgiziledi. Olardyń qatarynda fızıoterapııa, balneologııalyq em-sharalar, emdik dene shynyqtyrý jáne basqa da qalpyna keltirý protsedýralary bar. Mundaı em-sharalar ońaltý kezinde qol jetkizgen nátıjeni saqtaýǵa, adamnyń ózin jaqsy sezinýine jáne kúndelikti belsendiligin jalǵastyrýyna kómektesedi.
2026 jyldyń 1 tamyzyndaǵy jaǵdaı boıynsha 76 876 múgedektigi bar adam shıpajaıda em aldy. Bıyl mundaı qyzmetke qajettilik bildirgenderdiń jalpy sany 147 809 adam. Em alýshylardy sanatorııge qabyldaý jyl boıy, belgilengen kezeńderge sáıkes uıymdastyrylady.
Shıpajaıda em alý júıesin jetildirý jumystary jalǵasyp jatyr. Bul rette qoljetimdilik pen sapany arttyrýǵa basymdyq berilýde. Eń bastysy, ár adamǵa qajetti ońaltý kómegi jeke qajettilikterine sáıkes jáne ózine qolaıly jaǵdaıda usynylýy qajet.
Aıta ketelik múgedektigi bar balalardy úı jaǵdaıynda ońaltý jobasy taǵy tórt óńirde iske qosylatyny týraly jazǵan edik.
