Shıpajaıda demalýshylar pandýstyń joqtyǵyna shaǵymdandy - Almaty oblysy
TALDYQORǴAN. QazAqparat - Almaty oblysynyń «Tekeli» shıpajaıynda demalýshylar ǵımarattyń ishinde múldem pandýstyń joqtyǵyna shaǵymdandy. Al bul jerge kóbine memleket tarapynan berilgen arnaıy joldamamen múmkindigi shekteýli jandar keledi, dep habarlaıdy QazAqparat tilshisi.
Alakól aýdanynyń turǵyny Ergen Baımaǵanbetuly 4 jastaǵy ulymen osy shıpajaıda em alyp jatqandardyń biri. Ol ózdiginen júre almaıtyn uly ekeýine shıpajaı qyzmetkerleri ekinshi qabattan bólme bergenin aıtady. Qazir Ergen ulyn kúnine birneshe márte ekinshi qabattan birinshi qabatqa túsirip, kóterip sharshaǵanyn, biraq uly úshin amaldyn joqtyǵynan shydap júrgenin jetkizdi.
«Múmkindigi shekteýli jandardyń jaǵdaıyn oılamaǵan. Adamnyń janyna batady. Men jaraıdy, qarańyzshy myna jerde áıel adamdar bar. Olar 12-13 jastaǵy balalaryn ekinshi, úshinshi qabatqa kóteredi. Óte qıyn jaǵdaı. Taǵy bir másele, bul jerde balalardyń arbasy múldem joq eken. Bizge memleket tarapynan joldama berilgendikten, sol jaqta múgedekter arbasy bar dep oılap qaldym. Ókinishke oraı, tek myna balalar arbasy ǵana bar. Onyń ózi bireý ǵana. Osy arbaǵa qazir balamdy salyp alyp, kóterip, tasyp júrmin», -deıdi Ergen Baımaǵanbetuly.
Al «Tekeli» shıpajaıynyń bas dárigeri Oleg Kan pandýs máselesi 10 kúnniń ishinde sheshiledi dep sendirdi. Sondaı-aq ol arbamen qozǵalatyn jandarǵa 6 oryn birinshi qabattan qarastyrylǵanyn jetkizdi. Sózinshe, Alakól aýdanynan múmkindigi shekteýli balasymen kelgen ákege ol jerden oryn jetpeı qalypty. Al qazir bul shıpajaıda 96 adam em alýda. Basym bóligi, memleket tarapynan berilgen arnaıy joldamamen kelgen múmkindigi shekteýli jandar.
