Shıpajaı mańyndaǵy orman qorshaldy: Býrabaıda tekserý júrgiziledi
ASTANA. KAZINFORM — Aqmola oblysynyń Jer resýrstaryn basqarý departamenti Býrabaı aýdanyndaǵy orman ishinde qurylys júrgizý úshin ruqsat qujattarynsyz qorshalǵan jer telimin tekseredi, dep habarlaıdy Kazinform tilshisi.
«Şýchınskıı» shıpajaıyna jaqyn mańdaǵy Býrabaı ormanynda qurylys júrgizý úshin qorshalǵan jer telimine qatysty másele qaıta kóterildi. Jergilikti turǵyndardyń narazylyǵyn týdyrǵan bul jaǵdaı boıynsha aýdan ákimdigi tekserý júrgizgenimen, býrabaılyqtardyń aıtýynsha, ormandaǵy qurylys jumystary toqtamaǵan. Buǵan deıin qazylǵan baǵandardyń ornyna qazir qorshaý ornatylǵan.
«Býrabaı» memlekettik ulttyq tabıǵı parkiniń málimetinshe, jer teliminiń naqty ornalasqan jerin jáne onyń erekshe qorǵalatyn tabıǵı aýmaq shekarasyna qatystylyǵyn anyqtaý úshin sol jerde tekserý júrgizilgen.
— Tıisti materıaldar qaraý jáne quzyreti sheginde sharalar qabyldaý úshin Aqmola oblysynyń Jer resýrstaryn basqarý departamentine joldandy, — dep túsindirdi vedomstvo ókilderi.
Al Aqmola oblysynyń Jer resýrstaryn basqarý departamenti memlekettik baqylaý bóliminiń mamandary bul máseleni qarastyryp jatqanyn habarlady. Tekserý qorytyndysy qosymsha jarııalanady.
Buǵan deıin Býrabaı ormanynda qurylysqa ruqsat qujattarynsyz jer telimi qorshalǵany habarlanǵan bolatyn. Býrabaı aýdanynyń ákimdigi jer telimine baryp, nysan qurylysyna qajetti ruqsat qujattarynyń joq ekenin anyqtaǵan.
