Shyńjańdyq qandasymyz jartylaı marafonda rekord jańartty - sheteldegi qazaq baspasózi
ASANA. KAZINFORM - Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Túrki tildes memleketterdiń shahmat qaýymdastyǵy quryldy – ÓzA
Astana qalasynda Qazaqstan, Túrkııa, Ázerbaıjan, Qyrǵyzstan, Túrikmenstan jáne Ózbekstan ókilderiniń qatysýymen Túrki tildes memleketter shahmat qaýymdastyǵyn (TSCCA) qurý jónindegi memorandýmǵa qol qoıdy.
Bul týraly osy aptada «ÓzA» aqparat agenttigi habarlady.
Habarlamadan málim bolǵanyndaı, TSCCA-nyń bas hatshysy qyzmetine Ázerbaıjannyń belgili shahmatshysy, sport sheberi Ilaha Gadımova saılandy.
Aıta ketý kerek, bul qaýymdastyqty qurý ıdeıasy 2024 jyldyń qyrkúıeginde Býdapeshtte ótken 45-shi shahmat olımpıadasy men FIDE Bas Assambleıasy kezinde usynylǵan bolatyn.
Sol jıynda qatysýshy memleketter FIDE-men baılanysty qurylym qalyptastyrý baǵytynda birlesip jumys isteýge ýaǵdalasqan edi.
Ózbekstandyq BAQ-tyń dereginshe, jańa uıymnyń basty maqsaty – ulttyq shahmat federatsııalary arasyndaǵy yntymaqtastyqty nyǵaıtý, ózara tájirıbe almasý, iri týrnırler ótkizý jáne balalar men jastarǵa arnalǵan baǵdarlamalar ázirleý.
Aıta ketý kerek, uıymnyń bas keńsesi Túrki áleminiń mádenı astanasy sanalatyn Qazaqstannyń Túrkistan qalasynda ornalasady. Qujatqa sáıkes, Túrkııa 2025 jyldyń sońyna deıin qaýymdastyqqa tóraǵalyq etedi, al 2026 jyldan bastap basshylyq mindeti Qazaqstanǵa ótedi.
Qytaı qarjylandyratyn kompanııalar Qazaqstanda bos jumys oryndary jármeńkesin ótkizdi – «Halyq gazeti»
24 qazanda Qazaqstannyń elordasy Astana qalasynda Qytaı qarjylandyratyn kásiporyndardyń 2025 jylǵy jumysqa shaqyrý jármeńkesi ótti, dep habarlaıdy Qytaıdyń «Halyq gazeti» basylymy.
Atalǵan basylymnyń dereginshe, is-sharany Qazaqstandaǵy Qytaıdyń Bas saýda palatasy, Qytaıdyń Saýdany damytý jónindegi keńesiniń Qazaqstandaǵy ókildigi jáne Qazaqstandaǵy Qytaı joǵary oqý oryndarynyń túlekteri qaýymdastyǵy birlesip uıymdastyrǵan.
Keltirilgen derekterge súıensek, bul jármeńke jyl saıyn ótkiziledi, bıyl ol tórtinshi ret uıymdastyrylyp otyr. Osy jolǵy is-sharaǵa Qazaqstandaǵy Qytaı qarjylandyratyn 22 kompanııa qatysqan.
Sonymen qatar osy aptada «Halyq gazeti» basylymynda «Beıjińnen Almatyǵa ıntermodaldyq tasymaldaý iske qosyldy» degen aqparat jaryq kórdi.
Qytaılyq BAQ-tyń málimetinshe, 27 qazanda tolyq júk tıelgen konteınerlik poıyz Beıjińniń Fanshan aýmaǵynan jolǵa shyqty. Alda Shyńjańnyń Tarbaǵataı aımaǵyna baryp, júktiń bir bóligi Baqty portynan avtomobıl kóligimen tasymaldanady jáne Qazaqstannyń Almaty qalasyna jetedi.
Bul Beıjińde ashylǵan «temirjol + tasjol» transshekaralyq ıntermodaldyq kólik bıznesi. Demek, bul Beıjińnen Ortalyq Azııanyń logıstıkalyq arnasyna jańa joldyń qosylýyn bildiredi.
Qazaqstan men Irannyń oblystary arasyndaǵy yntymaqtastyq artady - ParsToday
Qazaqstan Respýblıkasynyń Irandaǵy Elshisi men Zándjan gýbernatory arasyndaǵy kezdesýde ekonomıka, mádenıet, týrızm jáne oblystyq kommýnıkatsııa salalaryndaǵy ekijaqty yntymaqtastyqty damytýǵa basa nazar aýdaryldy, dep jazdy ParsToday aqparat agenttigi.
Irandyq BAQ-tyń dereginshe, Qazaqstannyń Elshisi, Ekonomıkalyq Yntymaqtastyq Uıymynyń (EYU) basshysy Ońtalap Ońalbaev Qazaqstanda 100-ge jýyq ırandyq kompanııanyń qatysýymen ekinshi saýda-ekonomıkalyq konferentsııanyń ótýine silteme jasaı otyryp, bul sharany eki eldiń jeke sektorlary arasyndaǵy ózara is-qımyldy keńeıtý úshin qundy múmkindik dep sanady.
Qazaqstan elshisi provıntsııalyq yntymaqtastyqtyń keńeıýine toqtalǵan. Onyń aıtýynsha, qazirgi ýaqytta Mańǵystaý oblysy Gúlstan jáne Mazandaranmen yntymaqtastyq ornatyldy. Sondaı-aq Bandar Abbas pen Hormozgan Qazaqstannyń bir oblysy arasynda baılanys ornatý úshin konsýltatsııalar júrgizilip jatyr.
Osman Hamdı Beıdiń týyndysy aýktsıonǵa rekordtyq baǵamen satylymǵa shyǵaryldy - TRT
Osmanly óneriniń negizin qalaýshylardyń biri sanalatyn Osman Hamdı Beıdiń jubaıy Naıle hanymdy beınelegen 1880 jyldary salynǵan, biraq uzaq ýaqyt qupııa saqtalyp kelgen sırek portreti aýktsıonda 1,5 mıllıon dollarlyq rekordtyq baǵamen satylymǵa shyǵaryldy, dep jazady «TRT».
«TRT»-nyń málimetinshe, 1880 jyldary salynǵan, biraq uzaq ýaqyt boıy saqtalyp kelgen 98 × 68 sm kólemindegi kenepke maıly boıaýmen oryndalǵan bul shyǵarma sýretshiniń áıgili týyndylary sekildi tanymal emes. Munyń sebebi - kartınanyń ondaǵan jyl boıy sýretshiniń otbasynda saqtalyp, keıin jeke kollektsııaǵa ótýi. Bul portret 1995 jylǵa deıin Osman Hamdı Beı men jubaıy Naıle hanymnyń nemeresi 1913–2012 jyldary ómir súrgen Djenan Sarchtyń úıinde ilýli turǵan. Frantsııada Marı Palıart esimimen dúnıege kelgen Naıle hanym sýretshiniń ekinshi jary.
Sýretshiniń jubaıyn sol jaq qaptaldan, altyn tústi fon aldynda beınelegen taǵy bir portreti Ystanbul Sakyp Sabandjy mýzeıinde tur. Mýzeı ókilderi altyn tústiń dástúrli túrde ıslam, Orta ǵasyrdaǵy Eýropa jáne erte renessans ónerinde qasıetti beınelerdi sýretteý úshin qoldanylǵanyn aıtady.
Iran men Qazaqstanda ál-Farabıge arnalǵan halyqaralyq kongress ótedi - EurasiaToday
Iran men Qazaqstan ókilderi Halyqaralyq ál-Farabı kongresin ótkizýge ýaǵdalasty.
Bul týraly Irandaǵy Qazaqstan elshisi Ońtalap Ońalbaev pen Irannyń Mádenı eskertkishter men kórnekti tulǵalar qaýymdastyǵynyń basshysy Mahmýd Shalýıımen kezdesýde málim boldy, dep jazady EurasiaToday.
EurasiaToday basylymynyń Mádenı eskertkishter men kórnekti tulǵalar qaýymdastyǵyna silteme jasap habarlaýynsha, osy uıymnyń basshysy Mahmýd Shalýıı Irandaǵy Qazaqstan elshisimen kezdesýine rızashylyq bildirdi.
Onyń aıtýynsha, tatý kórshilik pen ortaq mádenı mura eki el arasynda úzilmeıtin baılanys qalyptastyrdy. Eki el arasyndaǵy birlesken is-sharalardaǵy eń mańyzdy qadamdardyń biri – kórnekti tulǵalardy eske alý sharalaryn ótkizýge, sonyń ishinde Halyqaralyq ál-Farabı kongresin ótkizýge kúsh salý. Sebebi ál-Farabı álemdik deńgeıdegi uly ıslam fılosofy jáne ǵalym retinde eki el arasyndaǵy birlesken mádenı jáne ǵylymı yntymaqtastyqqa negizi bola alady.
Irandaǵy Qazaqstan elshisi Ońtalap Ońalbaev ta Iran men Qazaqstannyń tarıhı jáne mádenı negizi eki eldiń tereń órkenıettik tarıhy bar ekenin tilge tıek etken.
Shyńjańdyq qandasymyz jartylaı marafonda rekord jańartty - Harajorga
26 qazanda Chýntsın qalasynda ótken jartylaı marafonda Shyńjańnyń týmasy Dosbol Qabyljan erler arasyndaǵy jarysta 1 saǵat 4 mınýt 21 sekýnd tamasha nátıje kórsetip, jarys rekordyn jańartty, dep habarlaıdy qytaılyq Harajorga basylymy.
Qytaılyq BAQ-tyń habarlaýynsha, 22 jastaǵy Dosbol Іle qazaq avtonomııalyq oblysynyń Nylqy aýdanyna qarasty shaǵyn aýylda dúnıege kelgen.
Jastaıyn júgirip ósken ony 14 jasynda dene shynyqtyrý pániniń muǵalimi baıqap, 3000 jáne 5000 metr qashyqtyqtar boıynsha mamandanǵan orta jáne uzaq qashyqtyqqa júgirý boıynsha kásibı daıyndyqty bastaıdy.
2023 jyldyń qazan aıynda D. Qabyljan Іle ózeni marafonynda erler arasyndaǵy tolyq marafonda 2 saǵat 21 mınýt 22 sekýnd ýaqytpen jeńiske jetip, keremet debıýt jasaǵan.
Qytaılyq BAQ-tyń dereginshe, bıylǵy sáýirde ol Turpan Tszıaohe marafonynda 2 saǵat, 20 mınýt 12 sekýnd ýaqytpen tolyq marafondyq erler arasyndaǵy birinshilikte jeńimpaz atandy. Al mamyrda ol Kýka marafonynda erler arasyndaǵy tolyq marafon chempıonatynda jeńiske jetti. Eki aptadan keıin ol Іle ózeni marafony jartylaı marafonynda taǵy da chempıon atanǵan.
Sonymen qatar Dosbol Qabyljan 2025 jyl 17 tamyzda Djımsar Tıanshan marafonynda 2 saǵat, 19 mınýt jáne 36 sekýnd ýaqytpen jeńiske jetip, tolyq marafon úshin jańa jeke rekord ornatty.