Shyńjańdyq Aıman Jeńisnurqyzy dzıýdodan Qytaı chempıony atandy – sheteldegi qazaq baspasózine sholý
ASTANA. KAZINFORM - Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Túrik Memleketteri Uıymyna múshe elder «Turktransplant» júıesin qalyptastyrady - TRT
TMU Densaýlyq saqtaý mınıstrleriniń 4-shi otyrysy Ázerbaıjannyń Shýsha qalasynda ótti.
Ázerbaıjan Densaýlyq saqtaý mınıstri Teımýr Mýsaev uıymdastyrǵan jıynǵa TMU Bas hatshysy Kýbanychbek Ómiralıev, Túrkııa Densaýlyq saqtaý mınıstri Kemal Memıshoglý, Qyrǵyzstan Densaýlyq saqtaý mınıstri Alymqadyr Beıshenalıev, Ózbekstan Densaýlyq saqtaý mınıstriniń orynbasary Davron Sultanov jáne Qazaqstan Densaýlyq saqtaý mınıstriniń orynbasary Erbol Ospanov qatysty.
Bul týraly osy aptada Túrkııa Radıo Televızııa portaly habarlady.
Túrkııalyq basylymnyń málimetinshe, Mýsaev jıynda sóılegen sózinde uıymǵa múshe jáne baqylaýshy elder arasynda birtutas medıtsınalyq ǵylymı sala qurýdy, birlesken ǵylymı zertteýler júrgizýdi jáne ortaq medıtsınalyq bilim berý standarttaryn anyqtaýdy birlesken qyzmettiń negizgi baǵyty retinde qarastyratynyn aıtty.
Kezdesýden keıin mınıstrler uıym aıasynda organ men tinderdi transplantatsııalaý boıynsha aqparat pen tájirıbe almasýǵa múmkindik beretin «Turktransplant» júıesin qurýǵa qatysty nıet hattamasyna qol qoıdy.
«Sonymen qatar, TMU-ǵa múshe jáne baqylaýshy elderdiń densaýlyq saqtaý mınıstrlikteriniń ǵylymı-zertteý ınstıtýttary arasynda onkologııa, kardıologııa, oftalmologııa, pedıatrııa, travmatologııa jáne ortopedııa salalaryndaǵy ózara túsinistik týraly memorandýmdarǵa qol qoıyldy», dep túıindeıdi TRT.
Shyńjańdyq sportshy Aıman Jeńisnurqyzy Qytaı chempıonatynda altyn medaldy enshiledi - Jenmın jıbao
Іle qyzy Aıman Jeńisnurqyzy dzıýdodan upaı sany boıynsha el chempıonatynyń alǵashqy birinshiligin jeńip aldy.
Qytaıdyń Іshki Mońǵol avtonomııalyq ólkesi, Chıfen qalasynda ulttyq dzıýdodan upaı jınaý boıynsha ótken jarysta Іle Qazaq avtonomııaly oblysy Mońǵolkúre aýdanynyń dzıýdoshysy Aıman Jeńisnurqyzy áıelder arasynda +78 keli salmaqta altyn medal enshiledi. Jas sportshynyń bul jeńisi onyń jeke kúsh-qýatynyń dáleli ǵana emes, Shyńjań dzıýdosynyń damyp kele jatqanynyń jarqyn úlgisi, dep habarlaıdy Qytaıdyń «Jenmın jıbao» aqparattyq portaly.
Áıelder arasyndaǵy +78 keli salmaqtaǵy fınalda Aıman Chendý qalasynda ótken 31-shi jazǵy Ýnıversıada oıyndarynyń chempıony, tıantszındik Tszıa Chýndımen kezdesti. Aıman Jeńisnurqyzy jattyqtyrýshysynyń jarys aldynda belgilegen jobasy boıynsha, kúres tehnıkasyn durys ıgerip, oraıdy dál paıdalanyp, ıkemdi de qyraǵy áreketimen úlken basymdylyqpen jeńiske qol jetkizdi.
Aıta keteıik, bul altyn medal Aımannyń bıylǵy BRIKS-2024 oıyndarynda dzıýdodan +78 keli altyndy jeńip alǵannan keıin osy sanattaǵy ekinshi altyn medali. Bul sharada 33 ulttyq quramanyń 528 sportshysy 15-shi Ulttyq oıyndarǵa joldama alý úshin baq synasty.
Sıanda qazaqstandyqtar «dástúrli Qytaı medıtsınasy» boıynsha bilimderin tolyqtyrdy - «Halyq gazeti»
Jaqynda Sıan dástúrli Qytaı medıtsınasynyń mı aýrýlary emhanasy men Qazaqstan dástúrli medıtsına sarapshylarynyń qaýymdastyǵy birlesip, 2024 jyly dástúrli Qytaı medıtsınasynyń dıagnostıkasy men emdeý tehnologııasy boıynsha halyqaralyq oqý kýrsyn bastady. 12 qazaqstandyq emshi dástúrli Qytaı medıtsınasyn úırený úshin Shensı ólkesiniń Sıan qalasyna keldi, dep habarlaıdy Qytaıdyń «Halyq gazeti».
Atalǵan BAQ-tyń keltirgen derekterine súıensek, eki aptalyq kýrs tyńdaýshylary eki topqa bólinip oqıdy. Oqytý kýrsy dástúrli Qytaı medıtsınasynyń dıagnostıkalaý men emdeý jáne sıpattamalyq ádisterine negizdele otyryp, jergilikti medıtsınanyń negizgi teorııasyn, balalar tserebraldy sal aýrýyn, psıhıkalyq jáne basqa da jıi kezdesetin syrqattardy dástúrli Qytaı medıtsınasy boıynsha emdeýdi úıretedi. Kýrs zamanaýı medıtsınany dástúrli medıtsınamen, teorııalyq oqytý men klınıkalyq taǵylymdamalardy biriktire otyryp júrgizilmek.
«Sıan dástúrli Qytaı medıtsınasy mı aýrýlary emhanasynyń halyqaralyq medıtsınalyq jáne ınemen emdeý bóliminde qazaqstandyq emshiler ermenmen qaqtaý, lońqa qoıý, ıne shanshý jáne basqa da dástúrli Qytaı medıtsınasynyń utymdy tásilderin tikeleı úırenip, jeke tájirıbe jınaqtaıdy. Sol arqyly dástúrli Qytaı medıtsınasynyń ártúrli emdeý ádisterin meńgeredi», dep jazdy qytaılyq basylym.
Namanganda qaýynnyń 400-den astam túri ósiriledi - ÓzA
Ózbekstannyń Namangan oblysynyń «Mıngbýloq», «Chortoq», «ıAngıqýrǵon», «Chýst» aýdandarynda dıhandar ejelden qaýynnyń 400-den astam túrin ósirip keledi. Qashan ónim pisip jetilgende, qaýyn meıramy ótedi. Bul dástúr ujymdyq sharýashylyqtyń eńbekqorlarynyń qaýyn-qarbyzdan dám tatsyn degen maqsatta uıymdastyrylǵan. Ánshi-ónerpazdar án aıtyp, barshany qaýyn meıramyna shaqyrǵan, dep jazady Ózbekstannyń «ÓzA» aqparattyq portaly.
«ÓzA»-nyń atap ótýinshe, qaýyn meıramy keńinen jaıqalǵan baqtar men qunarly egistikterde, sondaı-aq eldi mekenderdiń ortalyǵynda dúbirlep ótken. Merekelik shara aıasynda túrli kórmeler men jarystar uıymdastyrylyp, halyqtyń kóńilin kóteretin oıyn-saýyqtar men serýender qyzý qarqynmen jalǵasqan. Meıram aıaqtalǵan soń, kelgen qonaqtarǵa, jaqyn týystaryna, sondaı-aq toı-dýmanǵa qatysa almaǵan qarııalar men naýqastarǵa erekshe yqylaspen qaýyndar tartý etilgen.
Sondaı-aq, osy aptada «ÓzA» basylymynda «Ortalyq Azııa tarıhynda tuńǵysh ret Parlamentaralyq odaq assambleıasy Ózbekstanda ótedi» degen aqparat jarııalady.
Ortalyq Azııa tarıhynda tuńǵysh ret Parlamentaralyq odaq assambleıasy Ózbekstanda ótedi.
Ózbekstandyq BAQ-tyń málimetinshe, Ózbekstan Olıı Majlıs Senatynyń Tóraǵasy Tanzıla Narbaeva Jeneva qalasynda ótip jatqan Parlamentaralyq odaqtyń (PO) 149-assambleıasynda odaq tóraıymy Týlııa Eksonmen kezdesti.
Parlamenttiń joǵarǵy palatasynyń habarlaýynsha, kezdesýde Ózbekstanda ótetin 150-assambleıanyń baǵdarlamasyn, is-sharaǵa qatysty josparlar men jańa jobalardy talqylady, dep jazady Ózbekstannyń «ÓzA» aqparattyq portaly.
«Kezdesý barysynda sońǵy jyldardaǵy eldegi ekonomıkalyq damý, áleýmettik qorǵaý júıesiniń jetildirilýi jáne adam quqyqtarynyń basymdyǵyn qamtamasyz etýge baǵyttalǵan reformalar Týlııa Ekson tarapynan erekshe atap ótildi», delingen habarlamada.
Sonymen qatar, Turaqty damý maqsattaryna qatysty jumys jáne bul baǵytta Ózbekstan parlamenti tarapynan atqarylyp jatqan sharalar jaıynda sóz aıtylǵan.
Qazaqstanda áıgili ırandyq aqyn jáne mıstık Hafız Shırazıdi eske alý rásimi ótti - ParsToday
Irannyń uly aqyny ári mıstıki Qoja Shamsýddın Muhammad Hafız Shırazıdi (1325-1390 jj.) eske alý mereıtoıyna oraı Qazaqstanda parsy tili jáne ırantaný fakýltetiniń stýdentteriniń qatysýymen saltanatty shara ótti, dep habarlaıdy «ParsToday» aqparat agenttigi.
Qazan aıynyń 20-shy kúni Iran kúntizbesinde belgili ırandyq aqyn Qoja Shamsýddın Muhammad Hafız Shırazıdiń atymen tirkelip, jyl saıyn bul kúni túrli baǵdarlamalar ótkiziledi. Hafız dostarynyń Qazaqstandaǵy kezdesýi Iran Islam Respýblıkasynyń mádenı keńes berý ornynda jáne Qazaqstannyń Astana qalasyndaǵy Saadı qorynyń ókildiginde ótti.
ParsToday agenttiginiń málimetinshe, bul sharada Irannyń Saadı qorynyń Qazaqstandaǵy mádenı keńesshisi jáne ókili Álı Akbar Talebı Matın Hafızdiń ómirbaıanyna toqtalyp, eńbekterin túsindirdi jáne onyń parsy tildi ırandyq aqyndardyń eń tanymal jáne eń ulylarynyń biri bolǵanyn aıtty. Dádenı keńesshi Hafız shyǵarmalaryn nazarǵa ala otyryp, ony Irannyń eń tanymal aqyndarynyń biri dep atap, uly shaıyrdyń shyǵarmalary tek Iranda ǵana emes, búkil álemde tanymal ekenin tilge tıek etken.
Sondaı-aq, Talebı Matınnyń aıtýynsha, Hafızdiń óleńderiniń taqyryby alýan túrli jáne onyń óleńderi dástúrli ırandyq mýzyka, beıneleý óneri jáne kallıgrafııada qoldanylady.
Irannyń Qazaqstandaǵy mádenıet jónindegi keńesshisiniń málimetinshe, Hafızdiń dıýanynda 500 sonet, 42 tórttik, birneshe oda bar jáne Hafız óziniń dıýanasyn 50 jyl boıy jazǵan.
