Shyńjańdyq Aıman men Suńqar biri altyn, biri qola júldeni enshiledi — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstanda Ortalyq Azııa Balalar ombýdsmany alǵashqy halyqaralyq forýmy ótip jatyr — ÓzA
Tashkent qalasynda BUU Balalar qory (ıÝNISEF) jáne EQYU-nyń Ózbekstandaǵy jobalar úılestirýshisimen birlese uıymdastyrylǵan Ortalyq Azııa memleketteri Balalar ombýdsmandarynyń alǵashqy halyqaralyq forýmy óz jumysyn bastady, dep jazady «ÓzA» aqparat agenttigi.
Habarlamada aıtylýynsha, «Ortalyq Azııa memleketterinde bala quqyqtaryn qorǵaý tetikterin jetildirýdiń ózekti máseleleri: balalar ombýdsmandarynyń óńirlik yntymaqtastyq perspektıvalary» taqyrybyndaǵy bul halyqaralyq jıynǵa Qazaqstan, Qyrǵyzstan, Tájikstan jáne Túrkimenstannyń balalar ombýdsmandary, sondaı-aq Fınlıandııa, Norvegııa, Horvatııa sııaqty Eýropa elderiniń balalar ombýdsmandary men Eýropa Balalar ombýdsmandary jelisiniń (ENOC) ókilderi qatysýda.
Shara barysynda, Ózbekstan Ortalyq Azııa elderiniń Balalar ombýdsmandary arasyndaǵy óńirlik dıalog alańyn qurý bastamasyn kóterdi.
Aıta keteıik, atalǵan forýmnyń negizgi maqsaty — balalardy qorǵaý salasyndaǵy tıimdi tájirıbe almasý, ortaq máselelerdi ońtaıly sheshý, óńirlik jáne transshekaralyq qaýip-qaterlerge qarsy ortaq tásilder qalyptastyrý maqsatynda Ortalyq Azııa elderi Balalar ombýdsmandary arasynda ózara is-qımyldyń nátıjeli óńirlik alańyn qurý.
Sondaı-aq osy aptada «ÓzA»-da «Qazaqstandyq bılıard sheberi „TMD–2025 kýbogy“ týrnıriniń jeńimpazy atandy» degen taqyryptaǵy aqparat jarııalandy.
Atalǵan BAQ-tyń málimetinshe, Tashkent qalasyndaǵy áıgili «STAR SNOOKER» bılıard klýbynda ótken bedeldi «TMD–2025 kýbogy» halyqaralyq reıtıngtik týrnıri óz máresine jetti. Bul dúbirli dodada Ózbekstan, Qazaqstan, Qyrǵyzstan, Tájikstan jáne Túrkimenstannan kelgen 121 bılıard sheberi baq synady.
Asa tartysty ótken fınalda qazaqstandyq Álibek Omarov joǵary kásibı sheberlik tanytyp, túrkimenstandyq Annamamed Annamamedovty 5:4 esebimen tize búktirip, týrnırdiń basty jeńimpazy atandy. Óz kezeginde Annamamedov qola júldege qol jetkizdi.
Al úshinshi oryn ózbekstandyq Nodırbek Mırzaev pen qyrǵyzstandyq Akjoltoı Turǵanbaevqa buıyrdy.
Gansý ólkesine Qazaqstannyń aýyl sharýashylyǵy ónimderi tıelgen alǵashqy poıyz keldi — «Halyq gazeti»
Jýyrda Qytaıdyń Gansý ólkesiniń Lýnnan qalasyna Qazaqstannyń Almaty qalasynan 1100 tonna zyǵyr tuqymy tıelgen júk poıyzy keldi. Bul Ortalyq Azııa poıyzy arqyly osy shaharǵa jetken alǵashqy aýylsharýashylyq júk poıyzy.
Bul týraly osy aptada Qytaıdyń «Halyq gazeti» basylymy habarlady.
Qytaılyq BAQ-tyń deregine súıensek, jergilikti keden departamentiniń málimetinshe, taýarlar partııasy elge Qytaı-Qazaqstan shekarasyndaǵy Qorǵas porty arqyly ótken. Poıyz 3000 shaqyrym joldy eńserip, jalpy quny 5,06 mıllıon ıýan bolatyn júkti tasymaldady. Aýylsharýashylyǵy taýary temirjol arqyly 20 kúnde jetkizilgen.
Sonymen qatar osy aptada «Halyq gazeti» basylymynda «Beıjińnen Qazaqstannyń Almaty qalasyna alǵashqy Qytaı-Eýropa (Ortalyq Azııa) poıyzy attandy» degen taqyryptaǵy aqparat jaryq kórdi.
Atalǵan basylymnyń málimetinshe, jaqynda Beıjińnen Almaty qalasyna júk poıyzy attandy. Bul Almatyǵa qaraı Qytaı- Eýropa (Ortalyq Azııa) poıyz baǵytynyń resmı ashylǵanyn bildiredi.
Keltirilgen derek boıynsha, poıyzǵa jalpy quny 20 mıllıon ıýannan asatyn 55 konteıner júk tıelgen. Onyń ishinde avtomobıl bólshekteri, torly matalar, kondıtsıonerler, mıkrotolqyndy peshter jáne basqa da ónimder bar. Poıyz Beıjińniń Fanshan aýmaǵynan jolǵa shyǵyp Alashankoý porty arqyly el shekarasynan shyǵady.
«Qytaı Temirjolynyń Beıjiń bıýrosy bolashaqta poıyz baǵyttaryn ashý jospary ońtaılandyrylatynyn habarlady. Sonymen qatar júk túrlerin kóbeıtip, Qytaı- Eýropa (Ortalyq Azııa) poıyzdaryn turaqty jáne tıimdi júrgizýdi qamtamasyz etý jumystary jalǵasady. Budan bólek, Qytaılyq kompanııalarǵa Qytaı- Eýropa (Ortalyq Azııa) poıyzdary arqyly halyqaralyq naryqqa shyǵýyna kómektesýdi maqsat tutady», dep jazady «Halyq gazeti».
Iran men Atom Qýaty Halyqaralyq Agenttigi arasyndaǵy kelisimge qol qoıyldy —
Iran Syrtqy ister mınıstri men Atom Qýaty Halyqaralyq Agenttiginiń Bas dırektory Iran men AQHA arasyndaǵy yntymaqtastyqty qalpyna keltirý týraly kelisimge qol qoıdy, dep jazdy Parstoday aqparat agenttigi.
Irandyq aqparat agenttiginiń habarlaýynsha, seısenbi kúni tańerteń Mysyr astanasy Kaırge kelgen Iran Syrtqy ister mınıstri Seıed Abbas Araqchı aldymen Mysyr Syrtqy ister mınıstri jáne Atom Qýaty Agenttiginiń bas dırektory Rafael Grossımen úshjaqty kezdesý ótkizdi. Odan keıin Rafael Grossımen jabyq esik jaǵdaıynda ótken eki saǵattyq kezdesýden keıin Odaq saraıyna baryp, Mysyr prezıdentimen kezdesti.
ParsToday aqparat agenttiginiń Sadav Sima aqparat agenttigine silteme jasap habarlaýynsha, Araqchı men Grossı Mysyr Syrtqy ister mınıstri Badr Abdel Atımen kezdesýden keıin Irannyń Atom Qýaty Halyqaralyq Agenttigimen yntymaqtastyǵyn qalpyna keltirý týraly kelisimge qol qoıdy.
Irandyq basylymnyń keltirgen málimetterine súıensek, atom energııasyn beıbit maqsatta paıdalanýdyń ajyramas quqyqtaryna kepildik beriledi.
Sondaı-aq, Atom Qýaty Halyqaralyq Agenttiginiń Bas dırektory Rafael Grossı Iranmen tehnıkalyq tekserýlerdi qalpyna keltirý týraly kelisimge qol jetkizýin dıplomatııa men turaqtylyqqa jol ashatyn durys baǵyttaǵy qadam ekenin aıtqan.
Shyńjańdyq Aıman men Suńqar biri altyn, biri qola júldeni enshiledi — Jenmın jıbao
Qytaıdyń Hanchjoý qalasynda dzıýdodan erler jáne áıelder arasynda Azııa kýbogy úshin jarys aıaqtaldy. Atalǵan qurlyqtyq jarysta shyńjańdyq dzıýdoshylar Qytaı komandasyna bir altyn bir qola medal alyp berdi, dep habarlaıdy qytaılyq Jenmın jıbao aqparattyq portaly.
Atalǵan BAQ-tyń dereginshe, Hanchjoý qalasynda dzıýdodan erler men áıelder arasynda Azııa kýbogynda Qytaı dzıýdo komandasy 9 altyn, 6 kúmis, 7 qola medal alyp, úzdik nátıjege qol jetkizgen. Munyń ishinde Shyńjańnan kelgen 2 sportshy bir altyn, bir qola medal alǵan.
Qytaılyq basylymnyń keltirgen málimetine súıensek, sol eki júldeni ıelengen shyńjańdyq sportshynyń biri Aıman Jeńisnur bolsa endi bireýi Suńqar Serik atty ulty qazaq sportshylar.
Osy retki qurlyqtyq jarysty Azııa dzıýdo qaýymdastyǵy uıymdastyrǵan, resmı oryndar kýálándirǵan halyqaralyq A dárejeli jarys sanalady. Qytaı, Kanada, Jańa zellandııa, Koreıa, Taıland qatarly 13 memleketten kelgen júzge jýyq dzıýdoshylar jarysqa qatynasqan. Jarysta erler men áıelder boıynsha jeke-jeke 7 dárejedegi jarys ornalastyrylǵan, Qytaı komandasy árbir dáreje boıynsha eresekter grýppasyna jáne jastar grýppasyna jeke-jeke ekiden sportshy qatystyrǵan.
Aıta keteıik, qytaılyq BAQ-tyń dereginshe, shyńjańdyq eki sportshy Suńqar Serik jáne Aıman Jeńisnur jaqynǵy jyldardan beri Qytaı elinde óziderin tanytyp kele jatqan jas sportshylar, ekeýiniń de jasy 22-de. Aıman qazir Qytaı elinde áıelder boıynsha 78 keliden joǵary salmaq dárejesinde birinshi orynda tur. Halyqaralyq reıtıngte 12-shy orynda. Suńqardyń halyqaralyq reıtıngtegi orny joǵary bolmaǵanymen, el ishindegi erler arasynda 81 kılogramdyq salmaq dárejesindegi birshama úzdik jas sportshy. Sonymen birge, memlekettik komandanyń eń negizgi túrde tárbıeleıtin sportshylarynyń biri.
Túrkııa otandyq «Altaı» tankiniń jappaı óndirisin bastady — TRT
Ankara zaýyty zamanaýı tank pen jańa býynnyń brondalǵan kólikterin shyǵaratyn bolady. Túrkııa jańa tank «Altaıdyń» jappaı óndirisin resmı túrde bastady. Bul óndiris Ankara qalasyndaǵy otandyq avtokólik óndirýshi «BMC» zaýytynda júzege asyrylýda jáne eldiń qorǵanys salasyndaǵy úlken jetistigi bolyp tabylady.
Bul týraly osy aptada Túrkııa Radıo Televızııa portaly habarlady.
Túrkııalyq BAQ-tyń dereginshe, «BMC» kompanııasynyń tóraǵasy Fýat Tosııaly juma kúni «bul joba ǵasyrlyq túrik armanynyń oryndalýy» ekenin aıtqan.
Onyń aıtýynsha, bul zaýyt ótken jyly negizi qalanǵannan keıin jappaı óndiristi bastady, bul tankterdiń Túrik Qarýly Kúshteri men odaqtas elderdiń qorǵanys qajettilikterin qanaǵattandyratynyna senimdi.
Zamanaýı tehnologııalarmen jabdyqtalǵan «Altaı» tanki «BMC Power» kompanııasy daıyndaǵan «BATU» qozǵaltqyshymen jumys isteıdi.
Ankaradaǵy óndiris zaýyty barlyq óndiris kezeńderin júzege asyrý úshin ónerkásiptik robottar men ozyq óndiris ádisterin qoldanady.