Shyńjańdaǵy BAQ qazaq tilindegi birlesken jobalardy júzege asyrmaq
ÚRІMJІ. KAZINFORM — Shyńjańdaǵy buqaralyq aqparat quraldary qazaq tilindegi kontentti kóbirek shyǵarýǵa nazar aýdaryp otyr. Bul týraly Shyńjań teleradıo korporatsııasy Halyqaralyq habar taratý ortalyǵynyń dırektory Chjao Sıaolı málim etti.
Aıta keteıik, Shyńjań teleradıo korporatsııasy 1949 jyly qurylǵan. Bul ujymda qazir 1,8 myńnan astam adam qyzmet etip júr.
— Bizdegi baǵdarlamalar 5 tilde taratylady. 8 telearna men 10 radıostantsııa bar. Bizdiń qurylymda bir saıt pen bir mobıldi qosymsha jumys istep tur. Atap aıtqanda, Qazaqstanmen 2004 jyldan beri yntymaqtastyqta jumysymyzdy jalǵastyryp kelemiz. 2004-2017 jyldar aralyǵynda Almatydaǵy áriptesterimizben birlesken jobany iske asyrdyq, ıaǵnı bizdiń baǵdarlamalar qazaq tilinde kórsetildi. 2018-2021 jyldary birneshe telearnamen yntymaqtastyq ornatyp, qytaı tilindegi fılmder men baǵdarlamalardy qazaq tiline aýdardyq. Dál qazir qazaqstandyq eki buqaralyq aqparat quralymen kelissóz júrip jatyr. Bul turǵyda Shyńjań aýmaǵynda túsirilgen ónimderdi qazaq tilinde daıarlaýdy josparlap otyrmyz, — dedi Chjao Sıaolı Qazaqstannyń buqaralyq aqparat quraldarynan quralǵan delegatsııamen kezdesý barysynda.
Onyń aıtýynsha, 2026 jyldyń aqpan aıynda Qytaıda jańa jyldy atap ótý aıasynda Qazaqstandaǵy áriptesterimen birge gala-kontsert uıymdastyrý josparlanǵan. Sol kezde Ortalyq Azııanyń bes elinen birlesken gala-kontsertke ánshiler shaqyrtylmaq.
— Bizde qazaq tilinde kórermen kóp jınaıtyn «Aqyn keldi» baǵdarlamasy bar. Budan bólek, bizdiń telearnalarda kórsetiletin ekinshi tanymal baǵdarlama ulttyq bıge arnalǵan. Osy oraıda qazaqtyń ulttyq bıleri men basqa da ult ókilderiniń bılerin tamashalaýǵa bolady. Oǵan basqa da elderden óner adamdaryn shaqyryp jatyrmyz, — dedi Shyńjań teleradıo korporatsııasy Halyqaralyq habar taratý ortalyǵynyń dırektory.
Óz kezeginde «Shyńjań jıbao» (medıa top) gazetine tıesili saıttyń redaktsııalyq bólimi basshysynyń orynbasary Tsze Ventszın qazir qazaq tilindegi jáne Qazaqstanǵa qatysty materıaldar kóp qaralym jınaıtynyn aıtty.
— Bizdiń saıtta Qazaqstanǵa qatysty jarııalanǵan kontentke taldaý jasadyq. Keıingi eki jylda 600-ge jýyq maqala jaryq kórgen, — dedi Tsze Ventszın.
Buǵan deıin habarlanǵandaı, Shyńjań-Uıǵyr avtonomııalyq aýdany úkimetiniń syrtqy baılanys jónindegi keńse basshysynyń orynbasary Sıao Even Qytaıda qazaqtyń aıtys ónerin damytýǵa qatysty pikir aıtty.