Shyńjańdaǵy 1,6 mln etnıkalyq qazaq Qazaqstan men Qytaı áriptestigin nyǵaıtýǵa úles qosyp otyr - elshi
ASTANA. KAZINFORM - Qazaqstannyń Qytaıdaǵy Elshisi Shahrat Nuryshev QHR Ulttar isteri jónindegi memlekettik komıteti men QHR Shyńjań-Uıǵyr avtonomııalyq aýdany Halyq úkimetiniń shaqyrýymen Qashǵar qalasyna (ShUAA) baryp, «Shyńjańnyń tarıhy men bolashaǵy» atty halyqaralyq forýmǵa qatysty.
QR Syrtqy ister mınıstrligi baspasóz qyzmetiniń habarlaýynsha, elshi is-sharanyń ashylý saltanatynda sóz sóılep, forýmǵa qatysýshylardy Qazaqstan men Qytaı qatynastarynyń jaı-kúıi men damý perspektıvalary týraly habardar etti.
Sh. Nuryshev Qazaqstan men Shyńjań arasyndaǵy serpindi yntymaqtastyqqa erekshe nazar aýdaryp, ShUAA aýmaǵyndaǵy 1,6 mln etnıkalyq qazaqtyń «altyn kópir» retinde Qazaqstan men Qytaı arasyndaǵy ekijaqty strategııalyq áriptestikti nyǵaıtýǵa qosyp otyrǵan úlesin atap ótti.
Atalǵan is-sharaǵa QHR Ulttar isteri jónindegi memlekettik komıtetiniń Tóraǵasy Pan ıÝe, ShUAA Halyq úkimetiniń Tóraǵasy Erkın Týnııaz, Beıjiń ýnıversıteti Partkom hatshysynyń orynbasary Tszıan Gohýa, Ortalyq ulttar ýnıversıteti men Qashǵar ýnıversıtetiniń rektorlary, sondaı-aq Qazaqstan, Ózbekstan, Qytaı, Avstralııa, Mysyr, Germanııa, Majarstan, Italııa, Reseı, AQSh, Mońǵolııa jáne t.b. 170-ten astam sarapshylar men ǵalymdar qatysty.
«Shyńjańnyń tarıhy men bolashaǵy» atty halyqaralyq forým aımaqtaǵy arheologııalyq qazba jumystarynyń nátıjelerine, sondaı-aq Shyńjań mádenıeti men tarıhyn jaqsy túsiný úshin halyqaralyq almasýlar men birlesken zertteýlerge yqpal etýge baǵyttalǵan.
Sapar barysynda qazaqstandyq delegatsııa «Qashǵar parki» ekonomıkalyq damý aımaǵyna baryp, óńirdiń saýda-ekonomıkalyq áleýetimen jáne shekaralas eldermen júrip jatqan saýda jobalarymen tanysyp, Qazaqstanmen yntymaqtastyqty damytý perspektıvalaryn talqylady.
Qashǵardyń ekonomıkalyq damý aımaǵynda 4 myńnan astam tirkelgen kásiporyn, onyń ishinde 250-den astam syrtqy saýda kásiporyndary bar. Qashqar aýdany Shyńjańnyń syrtqy saýdasynda mańyzdy oryn alady, 2023 jyl qorytyndysy boıynsha onyń ShUAA ımporty men eksportyndaǵy jalpy úlesi 23,4% qurady.
