Shyńjańda Oraza aıtqa 3 kún demalys beriledi — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstandyq ǵalymdar tumaýǵa qarsy jańa preparat ázirledi — ÓzA
Tumaý men jiti respıratorlyq vırýstyq ınfektsııalar búginde álem halqynyń densaýlyǵyna tóngen eń ózekti qaýipterdiń biri bolyp otyr. Jyl saıyn mıllıondaǵan adam vırýstyq aýrýlarǵa shaldyǵyp, olardyń taralýy ásirese kúz ben qys aılarynda kúsheıe túsedi. Maýsymdyq ınfektsııalardyń jedel taralýy medıtsına salasy úshin ǵana emes, jalpy qoǵam úshin de mańyzdy másele sanalady.
Osy turǵyda Ózbekstanda medıtsına men farmatsevtıka salasynda vırýstyq ınfektsııalardyń aldyn alý jáne olarmen kúresýdiń tıimdi tásilderin tabýǵa baǵyttalǵan ǵylymı zertteýler qarqyndy júrgizilip keledi. Mine osyndaı zertteýlerdiń nátıjesinde Ózbekstan Ǵylym akademııasynyń Polımerler hımııasy jáne fızıkasy ınstıtýty ǵalymdary vırýsqa qarsy preparat ázirledi.
Bul týraly osy aptada «ÓzA» aqparat agenttigi habarlady.
Atalǵan BAQ-tyń málimetinshe, otandyq ǵalymdar jasaǵan «TselAgrıp» preparaty vırýstarǵa qarsy belsendiligimen erekshelenip, ınterferon ındýktory retinde baǵalanyp otyr.
Preparattyń basty ereksheligi — ol vırýstarǵa tikeleı áser etýden góri, adam aǵzasynyń tabıǵı qorǵanys mehanızmderin belsendirý arqyly ımmýndyq júıeniń jaýap reaktsııasyn kúsheıtedi.
Mamandardyń aıtýynsha, dárilik quraldyń áser etý mehanızmi aǵzadaǵy ınterferondardyń túzilýin yntalandyrýǵa negizdelgen. Interferondar — vırýstarǵa qarsy tabıǵı ımmýndyq qorǵanystyń negizgi býyndarynyń biri sanalatyn erekshe aqýyzdar. Olar jasýshalarǵa vırýstyń enýi men kóbeıýine tosqaýyl qoıyp, ımmýndyq júıeniń tıimdi jumys isteýine yqpal etedi.
Birqatar memleket Iranǵa gýmanıtarlyq kómek jóneltti — Eurasia Today aqparat agentti
Ázerbaıjan, Reseı, Ózbekstan, Túrkimenstan, Tájikstan jáne Qytaı Irandaǵy shabýyldardan zardap shekken turǵyndarǵa gýmanıtarlyq kómek jiberdi, dep habarlaıdy Eurasia Today.
Atalǵan BAQ-tyń dereginshe, 8 naýryzda Ilham Álıev pen Masýd Pezeshkıan telefon arqyly sóıleskennen keıin, 11 naýryzda Ázerbaıjan Iranǵa 30 tonna gýmanıtarlyq júk jóneltti. Onyń quramynda un, kúrish, qant, aýyz sý, shaı, dári-dármek jáne medıtsınalyq buıymdar bar.
Sonymen qatar, Ózbekstan da birneshe júk kóligimen azyq-túlik pen medıtsınalyq kómekti jetkizdi. Kómek Irannyń Derregez qalasynda tabystaldy.
Túrkimenstannan Serdar Berdimuhamedov tapsyrmasymen, al Tájikstannan Emomalı Rahmon buıryǵymen gýmanıtarlyq júk jiberildi. Tájikstan kómeginiń jalpy kólemi 3610 tonna.
Reseı SІM ókili Marııa Zaharova Máskeý Iranǵa qoldaý kórsetýdi jalǵastyratynyn málimdedi. 12 naýryzda Reseı 13 tonnadan astam dári-dármekti Il-76 ushaǵymen jetkizdi.
Buǵan deıin Qytaı Mınabtaǵy mektepke jasalǵan shabýyl qurbandarynyń otbasylaryna qoldaý retinde 200 myń dollar bóletinin habarlaǵan.
Astana jeńil relsti kólik mamandarynyń úshinshi toby Tıantszınde oqýyn aıaqtady — «Halyq gazeti»
10 naýryz kúni Tıantszın temirjol tranzıt toby Astana jeńil relsti kólik jobasynyń (jolaýshylardy tasymaldaý jáne tehnıkalyq qyzmet kórsetýge mamandanǵan) úshinshi top kýrsanttaryna bitirý rásimin ótkizdi. Eki aılyq praktıkalyq daıyndyqtan keıin Qazaqstannan kelgen tyńdaýshylar oqýlaryn sátti aıaqtady, dep jazady «Halyq gazeti».
Qytaılyq BAQ-tyń málimetinshe, Astana jeńil relsi — Qazaqstan astanasyndaǵy alǵashqy temirjol tranzıt jelisi jáne qazirgi ýaqytta birlesken paıdalanýǵa berý jáne synaqtan ótkizýdiń mańyzdy kezeńine ótken.
Tıantszın temirjol tranzıt toby qazaqstandyq mamandar úshin arnaıy «jergilikti teorııalyq oqytýdy Tıantszındegi praktıkalyq oqytýmen» biriktire jasaǵan oqý júıesin ázirledi. Buǵan deıin poıyz júrgizýshileri men dıspetcherlerine arnalǵan praktıkalyq oqytý aıaqtalǵan edi. Qatysty kýrsanttar jobanyń paıdalanýǵa berý jáne synaqtan ótkizý boıynsha birlesken is-sharalaryna qatysa bastady.
Keltirilgen derekterge súıensek, oqý baǵdarlamasy praktıkalyq paıdalaný múmkindikterin arttyrýǵa baǵyttalǵan. Jolaýshylardy tasymaldaý baǵytyndaǵy taǵylymdamadan ótýshiler tótenshe jaǵdaılardy sheshý barysyn, sondaı-aq qyzmet kórsetý standarttaryn júıeli túrde meńgergen.
Sondaı-aq osy aptada Halyq gazeti basylymynda «Qytaıda mı-kompıýter ınterfeısi medıtsınalyq qurylǵysy naryqqa shyǵaryldy» degen mazmundaǵy aqparat jaryqqa shyqty.
Atalǵan basylymnyń dereginshe, Qytaıda julyn jaraqaty bar naýqastarǵa arnalǵan álemdegi alǵashqy ınvazıvti mı-kompıýter ınterfeısi medıtsınalyq qurylǵysy naryqqa shyǵarýǵa maquldandy.
Qytaıdyń Memlekettik dárilik zattar basqarmasy neuracle kompanııasy ázirlegen «NEO» qurylǵysyn tirkedi. Atalǵan tehnologııa julyn jáne moıyn jaraqaty saldarynan qol-aıaǵy sal bolyp, saýsaqtarynyń ustaý qabiletin joǵaltqan 18–60 jas aralyǵyndaǵy naýqastarǵa arnalǵan.
Implantatsııalanatyn qurylǵy mı sıgnaldaryn naqty ýaqyt rejıminde oqyp, dekodtaý arqyly naýqastarǵa oı kómegimen arnaıy pnevmatıkalyq qolǵapty basqarýǵa múmkindik beredi. Bul óz kezeginde zattardy ustaý, kóterý jáne kúndelikti qarapaıym áreketterdi oryndaýǵa jaǵdaı jasaıdy.
Málimetke sáıkes, qurylǵy epıdýraldy ádispen ornatylady, bul mı tinderine keletin zaqym qaýpin tómendetedi. Sonymen qatar júıe symsyz qýattandyrý jáne baılanys arqyly uzaq merzim paıdalanýǵa arnalǵan.
Qazirgi ýaqytqa deıin qurylǵy 36 naýqasqa klınıkalyq synaq aıasynda ornatylǵan. Nátıjesinde barlyq qatysýshyda qoldyń ustaý fýnktsııasy belgili bir deńgeıde jaqsarǵan. Keıbir naýqastarda júıke baılanystarynyń qalpyna kelý belgileri baıqalǵan.
Shyńjańda Oraza aıtqa 3 kún demalys beriledi— Harajorga
Shyńjań uıǵyr avtonomııalyq ólkesi óńirinde Oraza aıt merekesine oraı 3 kún demalys jarııalandy, dep habarlaıdy Harajorga basylymy.
Qytaılyq BAQ-tyń habarlaýynsha, óńirlik halyq úkimeti keńsesiniń 2026 jylǵa arnalǵan mereke jáne demalys kúnderin belgileý týraly qujatyna sáıkes, Oraza aıttyń negizgi kúni 21 naýryzǵa (senbi) týra keledi. Osyǵan baılanysty demalys 20 naýryzdan (juma) 22 naýryzǵa (jeksenbi) deıin jalǵasady.
Osylaısha, turǵyndarǵa jalpy úsh kún demalys beriledi.
— Atalǵan mereke etnıkalyq azshylyqtar úshin dástúrli dinı meıram bolyp sanalady, - dep jazady qytaılyq basylym.
BUU: Gaza máselesi boıynsha bastamalar halyqaralyq quqyqqa saı bolýy tıis — TRT
Birikken Ulttar Uıymy Bas hatshysy Antonıý Gýterrısh Gaza sektoryn qalpyna keltirýge baǵyttalǵan bastamalar halyqaralyq quqyq pen BUU Jarǵysyna negizdelýi qajet ekenin málimdedi, dep habarlaıdy Túrkııa Radıo Televızııa portaly Politico basylymyna silteme jasap.
Atalǵan BAQ-tyń keltirgen málimetterine súıensek, onyń aıtýynsha, Gaza máselesine qatysty Beıbitshilik keńesi usynyp otyrǵan bastama BUU-nyń ýákiletti qurylymdarymen úılestirilgen. Sonymen qatar bul maqsat BUU Qaýipsizdik Keńesi tarapynan aıqyndalyp, qoldaý tapqan.
Sonymen birge Antonıý Gýterrısh atalǵan qurylymnyń Gazany qalpyna keltirý sheńberinen tys aýqymdy ról atqarýy qajet emes ekenin atap ótti. Ol qazirgi daǵdarysty mundaı tásilder arqyly tolyq sheshý múmkin emestigin jetkizdi.
«TRT»-nyń dereginshe, BUU Bas hatshysy kez kelgen beıbit bastama halyqaralyq quqyq normalary men uıym Jarǵysynyń qaǵıdattaryna súıenýi tıis ekenin basa aıtty.
Sondaı-aq ol Ormýz buǵazy tóńiregindegi shıeleniske toqtalyp, Iran tarapyn sý jolyn jabýǵa baǵyttalǵan áreketterden bas tartýǵa shaqyrdy. Gýterrıshtiń aıtýynsha, BUU bul mańyzdy teńiz dálizin qorǵaýǵa jáne jaǵdaıdy turaqtandyrýǵa baǵyttalǵan bastamalarǵa qoldaý kórsete alady.
Budan bólek, ol Gaza sektoryndaǵy qaqtyǵys bastalǵaly beri Donald Tramppen tikeleı sóılespegenin, alaıda AQSh ákimshiliginiń ózge ókilderimen baılanys ornatqanyn atap ótti.
Altaı týmasy Qadilet Aqymbek Shyńjań rekordyn jańalady — CNR
Altaı aımaǵynyń týmasy, 19 jastaǵy sportshy Qadilet Aqymbek Shyńjań uıǵyr avtonomııalyq ólkesi boıynsha jańa rekord ornatty, dep habarlaıdy Qytaıdyń Ortalyq halyq radıosy.
Atalǵan BAQ-tyń dereginshe, 2026 jylǵy 12 naýryzda Chendý qalasynda ótken jabyq keshendegi jeńil atletıkadan ulttyq syılyq týrnıriniń ekinshi kezeńinde ol erler arasyndaǵy 3000 metr qashyqtyqta sátti óner kórsetti.
— Jarys qorytyndysy boıynsha Qadilet Aqymbek 8 mınýt 17 sekýnd 41 júzdik nátıje kórsetip, Shyńjań erleriniń jabyq keshendegi 3000 metrge júgirý boıynsha burynǵy rekordyn jańartty. Osylaısha, óńirdiń jeńil atletıka tarıhynda taǵy bir kórsetkish jańaryp otyr, - dep jazady CNR.