Shyńjańda báıge, kókpar tóreshilerine tuńǵysh ret arnaıy kýálik berildi
Shyńjańda at sporty, kókpar oıyny tóreshileriniń deńgeıin joǵarylatý maqsatynda tuńǵysh ret arnaıy kýrs uıymdastyryldy. Atalǵan kýrsqa Úrimji, Sanjy, Qulja, Qashqar qatarly óńirlerden kelgen, ár ult ókilinen quralǵan 60-tan astam tóreshi qatysyp, jaqsy nátıje kórsetkenderine arnaıy kýálik aldy. Budan keıin olar osy kýáligin kórsetý arqyly báıge, kókpar qatarly sporttyq básekelerde tóreshi bola alady, dep habarlaıdy Kazinform Qytaıdyń «Jenmın jıbao» aqparattyq portalyna silteme jasap.
Atalǵan BAQ-tyń keltirgen málimetine súıensek, osy jolǵy kýrsty Shyńjań Uıǵur avtonomııaly ólkelik Sport mekemesiniń sheshimimen, avtonomıaly ólkelik Sport bas qoǵamy jetekshilik etip, Shyńjań at sporty qaýymdastyǵy uıymdastyrǵan.
Shyńjań at sporty qaýymdastyǵynyń bas hatshysy Ban Jychıannyń aıtýynsha, Shyńjańda at sportyn, kókpar oıynyn ár ulttyń halqy óte jaqsy kóredi. Sondyqtan az ulttardyń sport túrlerinen at sportynyń, kókpar oıynynyń jarys erejelerine negizdele otyryp, osy jolǵy kýrstyq jumys uıymdastyrylǵan.
«Budan keıin báıge, kókpar jarystaryna tóreshi bolý úshin tóreshilik kýáligi bolýy kerek. Kókpar tartatyn alańnyń úlken-kishiligi, kókpar tastaıtyn sharbaqtyń bıiktigi, keńdigi, formasy qatarlylarǵa endi birtutas ólshem belgilenedi. Jarys pen tóreshi birtutas júıege túsirilgende ǵana, Shyńjańnyń at sportynyń damýyna tıimdi bolady», — deıdi Ban Jychıan.
Gansý ólkesi Aqsaı qazaq avtonomıaly aýdandyq mádenıet, sport jáne saıahat mekemesinen qyzmetkerleri bastap Shyńjańda ótken kýrsqa arnaıy komanda kelgen. Komandanyń basshysy Qabylbek Qajykeıuly aıtýynsha, báıge, kókpar sekildi at oıyndary árbir óńirge týrısterdi baýraı alady. Oǵan Shyńjańnyń jylqy sharýashylyǵynyń damýy, at sportyn damytýy erekshe áser qaldyrǵan.
«Osy jolǵy kýrs eki ólke arasyndaǵy taptyrmaıtyn oraıly sátterdiń biri boldy», - deıdi Qabylbek Qajykeıuly.
Qytaılyq BAQ-tyń dereginshe, buryn «aýyl tóreshileri» kýáligi bar tóreshiler boldy. Endi at sporttary anaǵurlym kásiptik deńgeıde jáne tartymdy ótkiziletin boldy. Shyńjań at sporty qaýymdastyǵy aldaǵy ýaqytta Іle, Tarbaǵataı, Altaı, Qashqar qatarly aımaqtarda jalǵasty kýrstar uıymdastyrylmaq.
