Shyńjańda álemdegi eń uzyn týnnel ashyldy

ASTANA. KAZINFORM — «Tıanshan Shenlı» — álemdegi eń uzyn tas jol týnneli. Uzyndyǵy — 22,13 shaqyrym. Eki qalany baılanystyratyn týnnel resmı túrde ashyldy, dep habarlaıdy Sınhýa.

Shyńjań Uıǵyr avtonomııalyq aýdanyndaǵy (ShUAR, Qytaıdyń soltústik-batysynda) Tıan-Shan taýlarynyń ortalyq bóligi arqyly ótetin týnnel jol júrý ýaqytyn birneshe saǵattan shamamen 20 mınýtqa deıin qysqartady.

Sonymen qatar, týnneldiń bir bóligi — G0711 Úrimshi-ıÝlı ekspress joly tolyǵymen paıdalanýǵa berildi. Magıstral Shyńjańnyń soltústigi men ońtústigindegi qalalyq klasterlerdi baılanystyrady.

Ortalyq Shyńjań arqyly 2500 shaqyrymǵa sozylyp jatqan Tıan-Shan taýlary soltústigindegi eń úlken qala Úrimjini aımaqtyń ońtústigindegi eń iri shahar Korladan bólip tur. Jol ashylǵannan keıin eki iri qala arasyndaǵy jol júrý ýaqyty 7 saǵattan shamamen 3 saǵatqa deıin qysqaryp, soltústik pen ońtústik Shyńjań arasyndaǵy ekonomıkalyq ıntegratsııany ilgeriletip, syrtqy almasý arnalaryn ashty.

Bes jylda salynǵan jedel joldyń uzyndyǵy 324,7 shaqyrym, jalpy ınvestıtsııa kólemi 46,7 mıllıard ıýan (shamamen 6,63 mıllıard AQSh dollary) boldy.

Týnnel qurylysyn júrgizýde onyń erekshe kólemine baılanysty qıyndyqtar týyndaǵan. Onyń uzyndyǵy - 22,13 shaqyrym, maksımaldy tereńdigi - 1112,2 metr. On alty geologııalyq buzylý aımaǵyn kesip ótetin jol bes negizgi qurylys máselesine tap bolady. Atap aıtqanda, joǵary geologııalyq kerneý, joǵary seısmıkalyq qarqyndylyq, qatań ekologııalyq talaptar, qatty sýyq jáne bıiktik.

Osyǵan deıin Qytaıda álemdegi eń iri muz jáne qar parki ashylǵany týraly jazdyq.