Shyńjańda 500 myń bastan astam qazaq qoıyn asyldandyrdy - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Túrkııa holdıngi Qazaqstan aýmaǵynda qant zaýytyn salýdy josparlaýda – Eurasia Today
Qazaqstan aýmaǵynda qant zaýytyn salý taqyryby Aýyl sharýashylyǵy mınıstri Aıdarbek Saparov pen túrkııalyq Safi Holding kompanııasynyń bas atqarýshy dırektory Safı Atakanmen kezdesýde talqylandy.
Bul týraly osy aptada Qyrǵyzstanda shyǵatyn Eurasia Today aqparat agenttigi habarlady.
Atalǵan BAQ-tyń keltirgen derekterine súıensek, Túrkııadaǵy eń iri ónerkásiptik holdıngterdiń biri sanalatyn Safi Holding Qazaqstanda jylyna 140 myń tonnaǵa deıin qant óndiretin joǵary tehnologııalyq zaýyt salý jobasyn júzege asyrýǵa múddeli. Zaýyttyń qyzylsha óńdeý qýaty – 1 mln tonna. Jobanyń boljamdy ınvestıtsııa kólemi – 150–200 mıllıon AQSh dollary.
Qazirgi ýaqytta ınvestorlar zaýytty ornalastyrý úshin qolaıly óńirlerdi qarastyrýda. Ornalasatyn oryndy tańdaýdaǵy basty faktorlar – qant qyzylshasyn ósirýge jaramdy egistik jer kóleminiń jetkiliktiligi jáne ınfraqurylymmen qamtamasyz etilýi.
QR Aýyl sharýashylyǵy mınıstrligi jobany iske asyrý úshin tolyq qoldaý kórsetýge daıyn ekenin, sonyń ishinde qoldanystaǵy zańnama aıasynda memlekettik qoldaý sharalaryn usynýǵa ázir ekenin rastady.
Qyrǵyzstannan 5,2 mlrd sýmdyq altyn buıymdardy zańsyz ákelgen azamat ustaldy –
Ándijan jáne Ferǵana oblystary boıynsha Memlekettik qaýipsizdik qyzmeti basqarmalarynyń qyzmetkerleri júrgizgen jedel shara barysynda Qyrǵyz Respýblıkasynan Ózbekstan aýmaǵyna «Vodıl avto» shekara keden beketi arqyly ótpek bolǵan Ándijan qalasynyń 1992 jyly týǵan turǵyny ustaldy.
Belgilengen tártipte júrgizilgen tekserý nátıjesinde, azamattyń kıiminiń ishine jasyryp, zańsyz alyp ótpek bolǵan 859 dana zergerlik buıym men 1 dana qol saǵaty tárkilendi, dep habarlaıdy «ÓzA» aqparat agenttigi.
Atalǵan BAQ-tyń dereginshe, saraptama qorytyndysy boıynsha, atalǵan zergerlik buıymdardyń hımııalyq quramy – altyn, al keıbiri brıllıant tastarmen bezendirilgen. Zattardyń taza salmaǵy – 4 keli 155 gr, al jalpy naryqtyq quny – 5 mıllıard 213 mıllıon sým dep baǵalanǵan.
Tergeý barysynda belgili bolǵandaı, bul qymbat áshekeı buıymdardy Túrkııadan Qyrǵyzstanǵa jetkizgen. Al kúdikti azamat olardy 400 AQSh dollary kólemindegi syıaqy úshin Ózbekstan aýmaǵyna shekara arqyly ótkizip bermek bolǵan.
Sondaı-aq osy aptada «ÓzA»-da «Túıe baǵyp jan baqqan Tórehan» degen taqyryptaǵy aqparat jarııalandy.
Habarlamada aıtylýynsha, Qaraqalpaqstan Respýblıkasynyń Shomanaı aýdanyndaǵy «Mamıı» eldimekeninde turatyn Tórehan Moldaǵálıev ómirin mal sharýashylyǵyna arnaǵan naǵyz eńbek adamy. Ol kóp jyldan beri túıe ósirýmen aınalysyp keledi. Qarapaıym aýyl turǵynynyń esimi búginde aýdan kóleminde ǵana emes, búkil Aral mańynda bilgir malshy retinde tanylyp otyr.
Búginde onyń sharýashylyǵynda 10 túıe bar, sonyń 6-y saýyndy. Túıe súti halqymyz úshin ejelden belgili shıpaly sýsyn. Dári-dármekten kem túspeıtin bul ónim adam aǵzasyn qýattandyryp, túrli dertke daýa bolady.
«Biraq paıdasy tek sútpen shektelmeıdi. Túıe júninen túrli buıymdar toqýǵa, turmystyq jáne sándik maqsatta qoldanýǵa jaraıdy. Osyndaı kásip otbasynyń negizgi tabys kózine aınalyp qana qoımaı, aýyldyq jerlerde jumyssyz otyrǵan áıelderge de úıden tabys tabýǵa múmkindik beredi», dep jazady «ÓzA».
Shyńjańda 500 myń bastan astam qazaq qoıyn asyldandyrdy – «Jenmın jıbao»
Shyńjań mal sharýashylyǵy ǵylym-tehnıka ınstıtýtynan alynǵan málimetke súıensek, Shyńjań qazaq qoıynyń tuqymyn asyldandyrý jáne býdandastyryp sapaly tuqym jetildirý salasynda kórnekti tabysqa qol jetkizip, qazirge deıin 514 myńnan astam qazaq qoıy asyldandyrylǵan, dep habarlaıdy qytaılyq «Jenmın jıbaodyń» basylymy.
Budandastyrý barysynda alǵan tól 565 myń bastan astam bolyp, ekonomıkalyq quny joǵarlap, sharýalardyń kirisin 170 mıllıon ıýannan astam arttyrǵan.
Qytaılyq basylymnyń dereginshe, qazaq qoıy Shyńjańdaǵy mal sharýashylyǵy raıondarynda baǵylady. Keneýsiz jem-shópke tózimdi, ártúrli qıyn shart-jaǵdaılarǵa shydamdy bolý syndy erekshelikterge ıe.
Alaıda, tuqym qýalaý ereksheliginiń yqpalyna ushyraǵandyqtan, bul qoı sortynyń eti birshama az, jetilýi baıaý, maı quramy da joǵary. Ásirese, quıryǵy úlken, quıryq maıynyń ustaıtyn mólsheri joǵary, jem-shópti shyǵyn etý mólsheri birshama kóp, bazardyń qajetin ońaıshylyqpen qanaǵattandyra almaıdy. Sondyqtan atalǵan qoı tuqymyn asyldandyryp, sapasyn joǵarylatý qajet bolǵan.
Qazaqstandyq án-bı ujymy Qytaılyq bı festıvaline qatysý úshin Úrimjige bardy – «Halyq gazeti»
Qazaqstandyq án-bı ujymy 7-inshi Qytaı Shyńjań halyqaralyq halyq bı festıvaline qatysý úshin Úrimjige keldi, dep habarlaıdy «Halyq gazeti» basylymy.
2025 jyldyń 21 shildesinde Shyńjańnyń Úrimji qalasyna 7-inshi Qytaı Shyńjań halyqaralyq halyq bı festıvaline Qazaqstannyń Qorqyt ulttyq án-bı toby, «Naz» ulttyq bı teatrynyń ártisteri kelgen.
Qytaılyq BAQ-tyń deregine súıensek, festıvalge kelgen qazaqstandyq ánshi-bıshiler ujymyn Úrimjidegi óner toby kútip aldy. Áýejaıda eki taraptyń ónerpazdary burala bıge basyp, aınalasyn dýmanǵa bólegen.
Sondaı-aq osy aptada «Halyq gazeti» basylymynda «Qytaıda 9 jańa «halyqaralyq sazdy qala» qosyldy» degen taqyryptaǵy aqparat jarııalandy.
Qytaılyq BAQ-tyń málimetinshe, Ulttyq Orman jáne jaıylym bıýrosynan alǵan málimetine sáıkes, jańadan ashylǵan «Sazdy jerler týraly konventsııanyń»15-inshi konferentsııasynda elimizdiń 9 oryny «halyqaralyq sazdy qalalar» retinde sertıfıkattaldy. Qazirge deıin Qytaıdaǵy «halyqaralyq sazdy qalalardyń» jalpy sany 22-ge jetip, álemde kósh bastaýda.
«Bul 9 aımaqqa keletin bolsaq, olar: Shanhaıdaǵy Chýnmın, Chjetszıan ólkesindegi Venchjoý, ıÝnnan ólkesiniń Dalı qalasy, Fýtszıan ólkesindegi Fýchjoý, Chjetszıan ólkesiniń ortalyǵy Hanchjoý, Tszıansıdegi Tszıýtszıan, Sıtszannyń ortalyǵy Lhasa qalasy, Tszıansýdyń Sýchjoý qalasy jáne Hýnan ólkesindegi ıÝeıan», dep jazady «Halyq gazeti».
Iran halqy – álemdegi eń aqyldy halyqtardyń biri - ParsToday
Sońǵy jahandyq esepter men statıstıka ırandyqtardyń álemdegi eń aqyldy halyqtardyń biri ekenin kórsetedi, dep jazdy ParsToday aqparat agenttigi.
ParsToday aqparat agenttiginiń málimeti boıynsha, sońǵy jahandyq esepter men statıstıkaǵa sáıkes, ırandyqtar álemdegi eń aqyldy adamdardyń qataryna kiredi. 2025 jylǵy ortasha ıntellekt koeffıtsıentiniń (IQ) sońǵy tiziminde ırandyqtar orta eseppen 106,30 kórsetkishpen álemde tórtinshi orynda turdy.
Gazada qaza tapqan jýrnalıster sany 232-ge jetti - TRT
Gazadaǵy úkimettik BAQ keńsesiniń málimetinshe, 2023 jyldyń 7 qazanynan beri Gazada 232 jýrnalıst qaza tapqan.
Keńseniń málimdemesinde «Gazada soǵys bastalǵannan beri qaza tapqan jýrnalıster sany fototilshi Adem Abý Harbıdtiń ólimimen birge 232-ge jetti»,- delingen.
Bul týraly osy aptada Túrkııa Radıo Televızııa portaly habarlady.
Birneshe buqaralyq aqparat quraldarynda jumys istegen palestınalyq fototilshi Adem Abý Harbıd Izraıldiń Gazaǵa jasaǵan áýe shabýyly kezinde qaza tapty.
Túrkııalyq BAQ-tyń málimetinshe, Abý Harbıd Izraıldiń Ál-Iermýk bazary mańyndaǵy shatyrdy nysanaǵa alǵan shabýyly kezinde úsh týysymen birge kóz jumǵan. Shabýyl kezinde onyń áıeli men balalary da jaralanǵan.