Shyńjań úkimeti Qazaqstan kásipkerlerimen baılanysty nyǵaıtpaq
ASTANA. KAZINFORM — Qytaıǵa saparlap jatqan Qazaqstan azamattarynyń sany artyp keledi. Bul týraly Úrimjide Shyńjań úkimetiniń syrtqy baılanys jónindegi keńse ókilderiniń Qazaqstannyń buqaralyq aqparat quraldarynan quralǵan delegatsııamen kezdesý barysynda málim boldy.
Shyńjań-Uıǵyr avtonomııalyq aýdany úkimetiniń syrtqy baılanys jónindegi keńse basshysynyń orynbasary Sıao Even Qazaqstan men Qytaı arasyndaǵy vızasyz rejımge baılanysty qazir eki jaqta da týrıster sany artyp kele jatqanyn aıtty.
— Al eńbek mıgranttaryna toqtalsaq, olar jumys isteýge arnalǵan vızany rásimdeýi tıis. Sondyqtan osy baǵyttaǵy derekterdi konsýldyq qyzmetten naqtylaý kerek. Atap aıtqanda, Úrimjide Qazaqstan kompanııalarynyń ókildikteri bar. Jalpy, osynda qazaqstandyq kompanııalardyń kelýin quptaımyz jáne qoldaý jasaýǵa daıynbyz. Shyńjań Jibek jolynyń ekonomıkalyq beldeýiniń negizgi aımaǵy bolǵandyqtan, Qazaqstan kásipkerlerimen ınvestıtsııalyq jobalardy júzege asyrýǵa múddelimiz, — dedi Sıao Even.
Sonymen qatar ol osy jyly kóktemde Qazaqstanǵa alǵash ret saparmen baryp, Astanadaǵy halyqaralyq forýmǵa qatysqanyn aıtty.
— Qazaqstan baı tabıǵı resýrstarymen jáne biregeı mádenı dástúrimen erekshe ekenin bilemin. Jalpy, Qazaqstan men Qytaı arasyndaǵy jan-jaqty strategııalyq seriktestigi qarqyndy damyp keledi. Bul turǵyda Shyńjańnyń róli mańyzdy, sebebi eki eldiń birlesken jobalarynyń kóbi bizdiń óńirmen baılanysty. Aldaǵy ýaqytta da Qazaqstanmen túrli salada yntymaqtastyqty nyǵaıtýdyń áleýeti zor, — dedi Sıao Even.
Budan buryn habarlanǵandaı, Shyńjańdaǵy buqaralyq aqparat quraldary qazaq tilindegi kontentti kóbirek shyǵarýǵa nazar aýdaryp otyrǵany málim boldy.