Shyńjań arqyly Qazaqstan men Gonkong arasyndaǵy yntymaqtastyqty ilgeriletýge daıynbyz – Jumanǵarın
ASTANA. KAZINFORM – Shyńjańnyń kómegimen Qazaqstan men Qytaı arasyndaǵy ınvestıtsııalyq yntymaqtastyqtyń jańa baǵytyn 25 maýsym kúni Úrimshi qalasynda ótken ekijaqty kezdesýde ShUAA partııa komıtetiniń hatshysy Ma Sınjýı Qazaqstan Respýblıkasynyń vıtse-premeri Serik Jumanǵarınge usyndy. Bul týraly QR Úkimetiniń baspasóz qyzmeti málim etti.
Ma Sınjýı atap ótkendeı, eki jyl boıy ShUAA men Qazaqstan basshylarynyń birneshe ret ózara sapary barlyq baǵyttaǵy ekijaqty qarym-qatynastyń tyǵyz yntymaqtastyǵy men oń dınamıkasyn kórsetedi.
«Úrimshidegi «Qazaqstan – Qytaı» aımaqaralyq yntymaqtastyǵynyń aldaǵy úshinshi forýmy — bul ózara is-qımyldyń jańa dáýirine engen tyǵyz dostyq qarym-qatynasymyzdyń mańyzdy nátıjesi. Ózara qarym-qatynasymyzdyń jańa kezeńinde biz Shyńjań arqyly Qazaqstan men Gonkong arasyndaǵy yntymaqtastyqty ilgeriletýge daıynbyz. Gonkong pen Makaodan Qazaqstanǵa ınvestıtsııa salýǵa daıyn iri kásiporyndarmen yntymaqtastyqty qarastyrýdy usynamyz. Bul qazir qyzmetti transformatsııalaý satysynda turǵan jáne Qazaqstanmen yntymaqtastyqqa úlken qyzyǵýshylyq tanytatyn iri kompanııalar. Sondaı-aq biz týrızmniń damýyna yqpal ete alamyz. ShUAA-ǵa Gonkongtan kóptegen týrıst keledi. Olarǵa bizdiń oryndar unaıdy jáne Qazaqstannyń tabıǵaty unaıtynyna senimdimin», - dedi Ma Sınjýı.
Óz kezeginde Serik Jumanǵarın ekijaqty qarym-qatynastardyń qarqyndy damýyn atap ótip, Qazaqstan men ShUAA úshin 2023 jyl ózara kelisimsharttar jyly ǵana emes, sonymen qatar QHR elimizdiń eń iri saýda seriktesi bolǵan jyl bolǵanyn atap ótti.
«ShUAA — Qazaqstannyń Qytaıdaǵy negizgi seriktesi, onyń úlesine qazaq-qytaı taýar aınalymynyń jartysyna jýyǵy tıesili. Óńiraralyq yntymaqtastyqty is júzinde keńeıtý aıtarlyqtaı ósý áleýetine ıe. Eń perspektıvaly baǵyttar: kólik jáne logıstıka, aýyl sharýashylyǵy, ınvestıtsııalyq yntymaqtastyq, saýda kedergilerin joıý jáne qolaıly saýda rejımin jetildirý, týrızm», - dep atap ótti Serik Jumanǵarın.
Kezdesý barysynda taraptar týrızm, temir joldardy damytý, jańa shekara ótkelderin salý, aýyl sharýashylyǵy ónimderin jetkizý kólemin ulǵaıtý salalaryndaǵy yntymaqtastyqty keńeıtý múmkindigin talqylady. Atap aıtqanda, Serik Jumanǵarın Qazaqstan sıyr etiniń eksportyn 500 myń tonnaǵa deıin arttyrýǵa daıyn ekenin málimdedi. Sonymen qatar ol Qytaıǵa mal sharýashylyǵy ónimderin, qosalqy ónimder men qus eti tolyq eksportynyń bastalýyna keri áser etetin kedergilerdi atap ótti.
Sondaı-aq vıtse-premer úkimettik deńgeıde «Azyq-túlik korporatsııasy» men QHR-dyń jumys istep turǵan memlekettik kompanııalary arasynda 3 mln tonnaǵa deıin astyq pen maıly daqyldardy jetkizýge kelisimshartqa qol qoıýdy usyndy.
26 maýsymda Úrimshi qalasynda (QHR ShUAA) «Qazaqstan – Qytaı» óńiraralyq yntymaqtastyqtyń úshinshi forýmy ótedi. Forým Qazaqstan men Qytaı óńirleri arasyndaǵy saýda-ekonomıka, kólik, ınvestıtsııa jáne mádenı-gýmanıtarlyq yntymaqtastyqtyń ózekti máseleleri boıynsha dıalog alańy.
Qazaqstan tarapynan úılestirýshi memlekettik organ — QR Saýda jáne ıntegratsııa mınıstrligi, Qytaı tarapynan — QHR Kommertsııa mınıstrligi.
2023 jyly QR men QHR arasyndaǵy ekijaqty saýda kólemi $31,5 mlrd (+30,1%) jetti, QR eksportyn qosqanda – $14,7 mlrd (+12,6%). 2024 jyldyń qańtar-sáýir aılarynda taýar aınalymy $9 mlrd qurady, bul ótken jyldyń sáıkes kezeńimen salystyrǵanda 10,3%-ǵa joǵary.
