Shyńǵys Súıinbaev Qaraǵandy oblysy ákiminiń orynbasary bolyp taǵaıyndaldy
QARAǴANDY. KAZINFORM - Qaraǵandy oblysynyń ákimdigine jańa kadrlyq ózgeris engizildi. Jańadan taǵaıyndalǵan oblys ákimi orynbasarynyń memlekettik basqarý, ónerkásip jáne tehnıkalyq retteý salalarynda mol tájirıbesi bar.
Qaraǵandy oblysy ákiminiń orynbasary Ermek Alpysov basqa jumysqa aýysýyna baılanysty atqaryp otyrǵan qyzmetinen bosatyldy. Onyń ornyna Qazaqstan Respýblıkasy Prezıdenti Ákimshiligimen kelisý boıynsha Shyńǵys Súıinbaev taǵaıyndaldy.
Jańa orynbasardy oblys ákimi Ermaǵanbet Bólekpaev tanystyrdy.
— Onyń tájirıbelik bilimi men kásibı daǵdylary oblys ákiminiń orynbasary qyzmetinde óz áleýetin tolyq júzege asyrýǵa múmkindik beretinine senimdimin, - dedi Ermaǵanbet Bólekpaev.
Shyńǵys Súıinbaev eńbek jolyn «QazMetrIn» RMK janyndaǵy Tehnıkalyq retteý jáne metrologııa komıtetiniń «Qazaqstandyq metrologııa qyzmeti» EMK Almaty fılıalynda 1-sanatty maman bolyp bastaǵan. Keıin tekserý zerthanasynyń meńgerýshisi qyzmetin atqardy.
Ár jyldary Qazaqstan Respýblıkasy Indýstrııa jáne ınfraqurylymdyq damý mınıstrliginiń Tehnıkalyq retteý jáne metrologııa komıtetinde, sondaı-aq Qazaqstan Respýblıkasy Saýda jáne ıntegratsııa mınıstrliginiń Tutynýshylardyń quqyqtaryn qorǵaý komıtetinde basshylyq qyzmetter atqardy.
2022–2023 jyldary Qazaqstan Respýblıkasy Indýstrııa jáne ınfraqurylymdyq damý mınıstrliginiń Indýstrııalyq damý komıteti tóraǵasynyń orynbasary boldy.
2023 jylǵy qarashadan bastap osy taǵaıyndaýǵa deıin Qazaqstan Respýblıkasy Ónerkásip jáne qurylys mınıstrliginiń Ónerkásip komıteti tóraǵasynyń orynbasary qyzmetin atqardy.
Buǵan deıin Qazaqstan Respýblıkasy eńbek jáne halyqty áleýmettik qorǵaý mınıstriniń buıryǵymen Dinmuhamed Gaıdaruly Qylyshpaev vedomstvonyń Kóshi-qon komıtetiniń tóraǵasy qyzmetine taǵaıyndalǵanyn habarlaǵan bolatynbyz.
