Shyńǵys Esenamanov fýtzaldan Qazaqstan quramasyndaǵy mansabyn aıaqtady
ASTANA. KAZINFORM — Shyńǵys Esenamanov fýtzaldan Qazaqstan quramasyndaǵy mansabyn aıaqtady.
Bul jóninde ol Qazaqstan fýtbol federatsııasyna bergen málimetinde aıtty.
— Bul men úshin sońǵy irikteý kezeńi boldy. Ulttyq quramada 20 jasymnan beri 16 jyl oınap kelemin. Qıyn, árıne. Ózim emotsııaǵa erik beretin adam emespin, biraq jigitterge birge oınaǵanyma baqytty ekenimdi aıttym. Bul sport, bul ómir. Kóp jaraqat aldym, qaıta oraldym, alańǵa shyqtym, árdaıym ózimdi dáleldeýge tyrystym. Jańa býyn ósip keledi, endi olarǵa jankúıer bolamyn. Árıne, mundaı jeńilisten keıin qoshtasqym kelmegen. Biraq sport degen osy toqtap qalmaı, ary qaraı júrý kerek, — dedi ol.
Shyńǵys Esenamanov 1989 jyly Qaraǵandy qalasynda dúnıege kelgen. 2008-2015 jyldary qaraǵandylyq «Tulpar», 2015-2023 jyldary almatylyq «Qaırat» sapynda oıyn kórsetti. Sońǵy eki jylda «Semeı» klýbynyń namysyn qorǵap keledi.
Aıta ketsek, fýtzaldan Qazaqstan quramasy Eýropa chempıonatyna fınaldyq satysynan tys qaldy.
El quramasy 2026 jylǵy Eýropa chempıonatynda óz tobynda ekinshi oryndy mise tutty.
Aldymen Albanııany 2:0 esebimen jeńse, odan keıin Armenııamen 4:4 esebimen teń oınady. Úshinshi kezdesýinde Danııadan 2:3 esebimen jeńilip qalsa, óz alańynda atalǵan qarsylasyn 7:3 esebimen tize búktirgen edi. Besinshi oıynda Albanııadan 4:2 esebimen basym tússe, dál sondaı eseppen syrt alańda Armenııaǵa ese jiberdi.
Osylaısha qurlyqtyq dodaǵa tikeleı shyǵý múmkindigin joǵaltyp aldy. Bul topta 16 upaımen birinshi orynǵa Armenııa quramasy taban tiredi.