Shyńǵys Aıtmatovtyń 100 jyldyǵy: Jazýshynyń qaryndasy úkimetten mereıtoıdy toılamaýdy surady

ASTANA. KAZINFORM — Belgili qyrǵyz jazýshysy Shyńǵys Aıtmatovtyń qaryndasy Roza Aıtmatova Qyrǵyzstan úkimetine jazýshynyń 2028 jyly josparlanǵan 100 jyldyǵyn toılamaýdy surap, ótinish joldady, dep habarlaıdy Kazinform tilshisi.

Ótinishtiń sebebi — ınternette jáne qoǵamda qaıtys bolǵan jazýshynyń atyna qatysty teris aqparattardyń taralýy.

Roza Aıtmatova óziniń áleýmettik jelidegi paraqshasynda jazýshynyń mereıtoıyn toılaǵannan keıin qarjynyń durys jumsalmaýy týraly sózder qaıta kóterilmes úshin alańdaýshylyq bildirip, úkimetti mereıtoıǵa bólingen qarjyny qarapaıym halyqqa kómek kórsetýge jumsaýǵa shaqyrdy.

— «Aıtmatovtyń 100 jyldyǵyna bólingen qarjyny basqa nársege jumsaýǵa bolar edi» degen pikirler taǵy aıtylýy múmkin dep senemin. Sondyqtan úkimetten osy qarjyny halyqtyń ómirin jaqsartýǵa jumsaýdy suraımyn. Bul Aıtmatovqa eń jaqsy estelik bolar edi, — dep jazdy ol.

Sonymen qatar, Roza Aıtmatova qoǵamdy birlikti saqtaýǵa jáne baýyrynyń esimin qaralamaýǵa shaqyrdy.

— Qymbatty qyrǵyz halqym, bireýler bizdiń qoǵamymyzda alaýyzdyq týǵyzýǵa tyrysyp jatqan sııaqty. Biz birligimizdi saqtap, arandatýlarǵa túspeýimiz kerek. Shyńǵys Aıtmatovty dáripteý nemese jamandaý qajet emes. Jatqan jeri jaıly bolsyn. Eger synaǵyńyz kelse, meni synańyz. Onyń múmkin bolǵan kúnásin ózime alamyn. Qaıtys bolǵandardyń rýhyna til tıgizbeńizder! — dep ótindi ol.

Eske salsaq, 2023 jyly Qyrǵyzstan álemge áıgili jazýshy Shyńǵys Aıtmatovtyń 95 jyldyǵyn saltanatty túrde atap ótken bolatyn, onyń shyǵarmashylyǵy álemdi ózgertip, adamdardyń kózqarastary men dúnıetanymyn keńeıtti.

Sonymen qatar, qazaqstandyq ónerpazdardyń VI Halyqaralyq «Aıtmatov jáne teatr» festıvaline qatysqany habarlanǵan bolatyn.

Budan bólek Qyrǵyzstanda Shyńǵys Aıtmatov týraly kórkem fılmniń túsirilimi bastalǵany belgili boldy.