Shyńǵys Árinov: Bul álem kýbogy birlik pen rýh kúshiniń úlgisi boldy
ASTANA. KAZINFORM — Astanada QR Tótenshe jaǵdaılar mınıstrliginiń 30 jyldyǵyna oraı erler men áıelder arasynda ótken qoıan-qoltyq urysynan álem kýbogynyń fınaly aıaqtaldy. Bul týraly mınıstrliktiń baspasóz qyzmeti jarııalady.
Eki kún boıy 20 elden kelgen 230 sportshynyń arasynda tartysty jekpe-jek ótti. Týrnır ózin-ózi qorǵaý jáne jekpe-jek dıstsıplınalary boıynsha adal kúres, rýhtyń kúshi men kásibı sheberliktiń kórinisine aınaldy.
Tótenshe jaǵdaılar mınıstri Shyńǵys Árinov jarysqa qatysýshylar men qonaqtar aldynda quttyqtaý sóz sóıledi.
— Álem kýbogynyń fınaly — abyroı men asyl qasıetterdi marapat emes, ómirlik ustanym dep biletin jandardyń basyn qosatyn saıys. Tatamıde eńbekpen jáne jigermen shyńdalǵan tulǵalar kezdesedi. Ár jekpe-jek — bar kúsh-jigerin salýdy, aıqyn oıdy jáne qorqynyshsyz áreket etýdi talap etedi. Mundaı qasıetter sportshylar men qutqarýshylardy biriktiredi. Tótenshe jaǵdaılar mınıstrliginiń qyzmetkerleri kún saıyn batyldyq tanytyp, sabyr saqtap, árdaıym kómek kórsetýge daıyn turady, — dedi Shyńǵys Árinov.
Sporttyq merekeniń erekshe atmosferasyn Qazaqstan sportynyń juldyzdary — Olımpıada chempıony Ilıa Ilın, MMA aralas jekpe-jek sheberi Artem Reznıkov, ataqty boksshy Vasılıı Levıt jáne strıt-vorkaýttan Qazaqstan quramasynyń bas bapkeri Aıtym Jaqypov jandandyra tústi. Qurmetti qonaqtar qatarynda kúshtik, arnaıy jáne quqyq qorǵaý organdarynyń ókilderi men basshylary, sondaı-aq Astana qalasynyń ákimi de boldy.
Týrnırde el namysyn 9 sportshy qorǵady. Jarys qorytyndysy boıynsha qazaqstandyq komanda joǵary nátıje kórsetti.
- Berkinbaeva Arýjan — álem chempıony
- Iskanderov Aslan — álem chempıony
- Pernebek Alıbı — álem chempıony
- Chebotareva Marııa — álem kýbogynyń kúmis júldegeri
Qoıan-qoltyq urysynan álem kýbogy fınalynyń Astanada ótýi elimizdiń sporttyq mansabyndaǵy mańyzdy oqıǵa, ári qazaqstandyq sportshylardyń joǵary deńgeıde daıyndalǵanynyń taǵy bir dáleli boldy.
Eske sala keteıik, sý dobynan Qazaqstan áıelder quramasy Azııa birinshiliginiń ¼ fınalyna ótti.