Shyndyqty aıtqanymdy moıyndaımyn - Ádilethan Moldahan sottan keıin málimdeme jasady
ALMATY. KAZINFORM – Almaly aýdandyq sotynda zańger ári bloger Ádilethan Moldahanǵa qatysty sot otyrysy ótti.
Oǵan QR Qylmystyq kodeksi 274-baby 2-tarmaǵy 3-bóligi boıynsha (kórineý jalǵan aqparat taratý) aıyp taǵyldy. Іs boıynsha jábirlenýshi retinde Almaty qalasy polıtsııa departamenti basshysynyń burynǵy orynbasary Erjan Uzabaev jáne Almaty qalasy polıtsııa departamenti Ákimshilik polıtsııa basqarmasynyń burynǵy basshysy Serik Shýmaev tanyldy.
Búgin sot otyrysynda prokýror aıyptaý aktisin oqydy. Onda aıyptalýshynyń Erjan Uzabaev jáne Serik Shýmaev týraly naqty dáleldersiz yqpaldy azamattardyń balalaryna qamqorshylyq tanytqany týraly beınejazba taratqany kórsetilgen.
Sondaı-aq sotta jábirlenýshi Serik Shýmaevtan jaýap alyndy. Ol aýqatty adamdardyń balalaryna qorǵan bolǵany týraly aqparat jalǵan ekenin aıtty.
Sot otyrysynan keıin BAQ ókilderiniń suraǵyna jaýap bergen Ádilethan Moldahan is-áreketterinde qylmys jasaý nıeti bolmaǵanyn atap ótti.
- Mende qylmys jasaıtyn oı bolǵan joq. Shyndyqty aıtqanymdy moıyndaımyn, - dedi ol.
Alaıda ótken sot otyrysynda aıyptalýshy óz kinásin tolyq moıyndap, isti qysqartylǵan tártipte ótkizýge ótinish jasaǵan bolatyn. Búgingi sot otyrysynda prokýratýra bul ótinishhatty qabyldamaǵany habarlandy. Sondaı-aq jábirlenýshi Uzabaevtyń advokaty Asylbek Ábdiraıymov moraldyq shyǵyn retinde 10 mln teńge jáne sot shyǵyndaryna 1 mln teńge azamattyq talap-aryz qoıǵan edi.
Buǵan deıin Almatyda 1 mıllıonnan astam oqyrmany bar bloger Ádilethan Moldahan ustalǵanyn jazǵanbyz.
Ol áleýmettik jelide quqyqtyq saladaǵy beınejazbalarymen tanymal. Ásirese, onyń Ál-Farabı dańǵylynda bolǵan jol apaty jaıly jarııalaǵan beınejazbalary jelide keńinen tarady.
