Shyndyq eshkimge kerek emes – Bıshimbaev pen Baıjanov sotta ne aıtty

ASTANA. KAZINFORM – Eks-sheneýnik Qýandyq Bıshimbaev pen onyń inisi Baqytjan Baıjanov apellıatsııalyq satydaǵy sot otyrysynda sóz sóıledi.

«Meniń tolyqtyrǵym kelgeni, aıtylǵandardyń bárine dálel keltirýge múmkindik berilmedi. Bizge kóptegen materıaldarmen tanysýǵa ruqsat etilmedi. Meniń bir túsingenim, shyndyq eshkimge kerek emes. Sheshim aldyn-ala shyǵarylyp qoıǵan. Sondyqtan ne derimdi bilmeımin, bári aıtyldy. Advokattarymnyń ustanymyn qoldaımyn», - dedi Q. Bıshimbaev búgingi apellıatsııalyq sot otrysynda.

Óz kezeginde B.Baıjanov óziniń zańsyz sottalǵanyn málimdedi.

«Qurmetti alqa, búgin sizder bul qateni túzete alasyzdar jáne bizdiń júıeniń ádiletti ekenin, buzýdyń ornyna qorǵaıtynyn dáleldeıtin múmkindik bar. Meniń isimdegi faktilerdi muqııat qaıta qaraýyńyzdy suraımyn. Sizden ádilettilik ornaýy úshin qoldan kelgenniń bárin jasaýyńyzdy suraımyn. Meniń úmitim jáne otbasymnyń bolashaǵy sizderdiń qoldaryńyzda. Meniń ádiletke degen senimimdi qalpyna keltirýge kómektesińizder, óıtkeni men qylmys jasaǵan joqpyn jáne meniń kinám dáleldenbegen», - dedi ol.

Sonymen birge, B.Baıjanov sottan úkimniń kúshin tolyq joıýdy jáne isti jańa sot talqylaýyna jiberýdi surady.

Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy. Qýandyq Bıshimbaev 24 jylǵa sottaldy.

Búgin Bıshimbaev pen Baıjanovqa qatysty apellıatsııalyq sot otyrysy bastaldy. Otyrys tikeleı efırde ótip jatyr.

Sondaı-aq, eks-sheneýniktiń merziminen buryn bosap shyǵýy múmkin be degen taqyrypta sholý jasaǵan edik.