Shynaıy hronıka: Kazinform-nyń 105 jyldyǵyna arnalǵan kitap MNU-ǵa syıǵa tartyldy
ASTANA. KAZINFORM – Maqsut Narikbayev University-ge «Kazinform. Shynaıy hronıka» kitabynyń 40 danasy syıǵa tartyldy. Kitap berý rásimi ýnıversıtet pen Kazinform Halyqaralyq aqparat agenttigi basshylyǵynyń kezdesýi barysynda ótti.
Kezdesý barysynda Kazinform Basqarýshy dırektory Naǵashybek Aldan mereıtoılyq kitapty shyǵarý barysynda júrgizilgen aýqymdy jumys jaıly aıtty. Al MNU Provosty Anar Ibraeva Kazinform redaktsııasyn mereıtoıymen quttyqtap, Prezıdent Teleradıokesheni basshylyǵyna senimdi seriktestik pen yntymaqtastyq úshin alǵysyn bildirdi.
Basylymda halyqaralyq aqparat agenttiginiń jańalyqtar ázirleý ustahanasynyń san qyrly syrymen kásibı qupııalary jazylǵan. Óz kezeginde Naǵashybek Aldan bul kitap bolashaq jýrnalıster úshin paıdaly oqý quraly bolatynyn atap ótti.
Qazaqstan Respýblıkasy Prezıdentiniń Teleradıokesheni qurylymyna kiretin Kazinform – elimizge halyqaralyq mártebe alǵan alǵashqy memlekettik aqparat agenttigi retinde tanymal. Agenttik 105 jyl boıy saıasat, ekonomıka, bilim, densaýlyq saqtaý, sport, mádenıet jáne qoǵam ómiriniń basqa da mańyzdy salalary týraly senimdi jáne ýaqtyly aqparat taratyp keledi.
Kazinform materıaldary oqyrmanǵa 5 tilde, sondaı-aq latyn grafıkasy men tóte jazý qarpinde de taratylady.
Atap óterlik jaıt, 2023 jyly MNU-da Prezıdent Teleradıokeshenmen birlese Halyqaralyq jýrnalıstıka mektebi ashyldy. Atalǵan mekteptiń dekany Aıgúl Jamalova munda seriktesterdiń arqasynda stýdentterdiń óndiristik praktıkadan ótýi, jumysqa ornalasýy, jetekshi otandyq jáne álemdik jýrnalısterden tájirıbe alýyna mol múmkindik baryn erekshe atap ótti.
Eske sala keteıik, «Kazinform. Shynaıy hronıka» kitaby ýnıversıtet kitaphanasynda oqyrmandar úshin qoljetimdi.