Shynar Qumarova: Teleradıokeshendegi qyzmet – eńbek jolymdaǵy eń jarqyn kezeń
ASTANA. KAZINFORM – Prezıdent Teleradıokesheninde jıyrma jylǵa jýyq eńbek etken zańger, memlekettik satyp alý bóliminiń basshysy Shynar Qumarova iri medıaholdıngtiń qalyptasýy men damýyndaǵy mańyzdy ózgeristerdiń kýási boldy.
Kazinform agenttiginiń tilshisine bergen suhbatynda ol shyǵarmashylyq ujymnyń nátıjeli ári sapaly eńbek etýine quqyqtyq qoldaýdyń qalaı yqpal etetinin áńgimeledi.
TRK – shyǵarmashylyq pen jaýapkershilik toǵysqan orta
Shynar Baǵdatqyzy Qumarova Prezıdent Teleradıokeshenine 2006 jyldyń aqpan aıynda zań keńesshisi qyzmetine qabyldanǵan. Ol jyldary mekemede quqyqtyq qyzmet tolyq qalyptaspaǵandyqtan, kóptegen ishki rásimder men qujattardy júıeleýge jáne jańadan ázirleýge týra kelgen.
— Alǵashqy áserim eń aldymen osy ortanyń erekshe bolmysymen baılanysty boldy: bir jaǵynan, memlekettik basqarý júıesine tán tártip pen joǵary talaptar bolsa, ekinshi jaǵynan, shyǵarmashylyq pen erkin oıǵa toly qaınaǵan orta bar edi. Munda sheshimderdiń jedel qabyldanatyny jáne ár qyzmetkerdiń óz isine úlken jaýapkershilikpen qaraıtyny súısintti. Bul kezeń men úshin úlken ómir mektebine aınaldy. Az ýaqyttyń ishinde medıa salasyn retteıtin quqyqtyq tetikter men zańnamanyń názik tustaryn jan-jaqty meńgerýge múmkindik týdy. Sol sátte Teleradıokeshenniń qarapaıym uıym emes, el tarıhyn qujattar men beınemuraǵattar arqyly saqtap, keler urpaqqa jetkizetin mańyzdy uıym ekenine kózim jetti, – deıdi Shynar Qumarova.
Medıaholdıngtiń árbir qyzmetkeri atqaratyn laýazymyna qaramastan úlken jaýapkershilik júgin arqalaıdy. Óıtkeni kontent sapasy, aýdıtorııanyń senimi men kompanııanyń bedeli osyǵan tikeleı baılanysty. Bul jaýapkershilik jýrnalıster men rejısserlerdiń shyǵarmashylyq eńbegimen ǵana shektelmeıdi. Medıaónimniń quqyqtyq, uıymdastyrýshylyq jáne tehnologııalyq negizin qalaıtyn tehnıkalyq mamandardyń, zańgerlerdiń, redaktorlar men ákimshilik qyzmetkerlerdiń kásibı ári dál jumysy da aıryqsha mańyzdy. Sondyqtan túpki nátıje árbir qyzmetkerdiń eńbeginen quralady. Teleradıokeshenniń ondaǵan jyl boıy joǵary kásibı deńgeıin saqtap, tabysty medıaholdıng retinde qalyptasýynyń syry da osynda.
Ár istiń óz mańyzy bar
Teleradıokeshenge deıin Sh. Qumarova zańgerdiń jumysy baıyppen atqarylatyn, muqııat ári asyǵystyqqa jol bermeıtin mamandyq dep oılaıtyn. Alaıda medıa salasynda bári basqasha bolyp shyqty — munda jýrnalıstermen, rejısserlermen, operatorlarmen jáne búkil shyǵarmashylyq ujymmen bir qarqynda jumys isteýge týra keldi.
— Kontent ázirlenip jatty, túsirilimder birinen soń biri ótip jatty, túrli mindetter qatar sheshimin taýyp jatatyn, — dep eske alady ol.
Qarbalas jumys pen jaýapty mindetter ony qaımyqtyrǵan joq. Kerisinshe, qyzmetiniń alǵashqy jyldary zań qyzmeti aldyna jedel ári naqty sheshimdi talap etetin mańyzdy mindetter qoıyldy. Ol kezeńde uıymnyń ishki quqyqtyq júıesi endi qalyptasyp jatqandyqtan, kóptegen mańyzdy qujattardy jańadan ázirleýge týra keldi. Atap aıtqanda, jumys tártibin retteıtin qujattar, túrli erejeler, avtorlyq sharttar men basqa da quqyqtyq aktiler daıyndaldy.
Munyń bári Teleradıokeshen qyzmetiniń ashyq ári zań talaptaryna saı júrgizilýin qamtamasyz etýge, shyǵarmashylyq ujym men búkil medıaholdıngtiń turaqty ári tıimdi jumys isteýine berik negiz qalaýǵa baǵyttaldy.
Keıipkerimiz Teleradıokeshenniń basty qundylyǵy – kún saıyn sapaly medıakontent jasaýǵa atsalysyp júrgen mamandar dep esepteıdi. Onyń aıtýynsha, eń kúrdeli jobalardy júzege asyrýǵa múmkindik beretin erekshe ortany ujymnyń ózi qalyptastyrady.
— Men úshin Teleradıokeshen ujymy – kásibılik pen shyǵarmashylyq qýat toǵysqan birtutas orta. Eger ony ózge medıaqurylymdardan erekshelendiretin qasıetti aıtsam, bul – asa joǵary jaýapkershilik pen qatelikke jol bermeıtin talapshyldyq, — deıdi Shynar Qumarova.
Onyń pikirinshe, dál osyndaı kózqaras pen mamandyqqa adaldyq – ujymnyń jyldar boıy joǵary sapa standarttaryn saqtap, aýdıtorııa senimin aqtap kele jatqanynyń basty kepili.
Jańarǵan qurylym, jańa mindetter
Jıyrma jylda Teleradıokeshen aýqymdy damý kezeńinen ótti. Tehnologııalyq jańǵyrýmen qatar uıym qurylymynda da eleýli ózgerister ótip, bul protsester jan-jaqty quqyqtyq súıemeldeýdi talap etti.
— Meniń basty mindetim – Teleradıokeshenniń medıaholdıngke aınalý kezeńinde jáne uıymnyń quqyqtyq mártebesi ózgergen barlyq jumys protsesteriniń bir sátke de kidirmeı, zań talaptaryna tolyq saı júrgizilýin qamtamasyz etý boldy, — deıdi keıipker.
Osy kezeńde zań qyzmetiniń jumysy da aıtarlyqtaı ózgerdi. Buryn dástúrli telenaryq ónimderin ázirleý protsesterin quqyqtyq turǵydan súıemeldeýge basa mán berilse, búginde mamandar múlde jańa deńgeıdegi mindettermen aınalysady.
— Bul ózgerister zań qyzmetiniń jumys aýqymy men mazmunyn túbegeıli ózgertti. Alǵashynda bizdiń mindetimiz negizinen kontent ázirleý protsesi men negizgi sharttardy quqyqtyq turǵydan qamtamasyz etý bolsa, búginde Teleradıokeshen kópsalaly ári qýatty medıaholdıngke aınaldy. Soǵan saı meniń jáne áriptesterimniń aldyna burynǵydan da kúrdeli, aýqymdy mindetter qoıylyp otyr, — deıdi Shynar Qumarova.
Shyǵarmashylyq ujymnyń quqyqtyq tiregi
Búginde Teleradıokeshen jýrnalısterdi, rejısserlerdi, operatorlardy, prodıýserlerdi, ınjenerlerdi jáne ózge de kóptegen mamandy biriktirgen iri medıaqurylymǵa aınaldy. Shynar Qumarovanyń aıtýynsha, osyndaı úlken ujymnyń turaqty ári úılesimdi jumysy naqty jolǵa qoıylǵan ishki tártip pen ózara senimge negizdeledi.
— Mundaı aýqymdy shyǵarmashylyq ujymnyń bir yrǵaqpen, irkilissiz jumys isteýi birneshe mańyzdy faktorǵa baılanysty. Sonyń eń bastysy — quqyqtyq jáne uıymdastyrýshylyq júıeniń berik bolýy. Zańger retinde bir nársege anyq kózim jetti: barlyq jumys protsesi rettelip, qajetti sharttar ýaqytyly rásimdelip, ár qyzmetkerdiń quqyǵy qorǵalǵanda jýrnalıster, rejısserler, operatorlar jáne ózge de mamandar ákimshilik máselelerge alańdamaı, bar kúsh-jigerin shyǵarmashylyq jumysqa jumsaı alady, — deıdi ol.
Onyń pikirinshe, tabystyń taǵy bir mańyzdy qupııasy — ujym ishindegi syılastyq pen senim. Jyldar boıy qatar eńbek etken adamdar arasynda erekshe túsinistik pen jaıly orta qalyptasady.
— Arqa súıer senimdi komandańnyń bar ekenin seziný eń kúrdeli sátterdiń ózinde jiger beredi ári alǵa jeteleıdi, — deıdi Shynar Qumarova.
Teleradıokeshen taǵdyrymnyń bir bóligine aınaldy
Jyldar óte Teleradıokeshen keıipkerimiz úshin kásibı turǵyda shyńdalatyn oryn ǵana emes, ómiriniń ajyramas bóligine aınalǵan.
— Búginde Teleradıokeshendegi jumys men úshin osy uǵymdardyń bárin toǵystyrǵan, taǵdyrymmen bite qaınasqan qundylyqqa aınaldy. Bul – jıyrma jylda maǵan kez kelgen jaǵdaıǵa beıimdelýdi, sabyr saqtaýdy jáne eń kúrdeli máselelerdiń zań aıasyndaǵy sheshimin tabýdy úıretken ómir mektebi. Bul – Teleradıokeshenniń damý jolymen birge ósip, kásibı turǵydan qalyptasqan mamandyǵym. Sonymen qatar bul – úlken jaýapkershilik júkteıtin mıssııa. Medıaholdıng atqaryp otyrǵan mindetterdiń aýqymyn jáne onyń turaqty ári qaýipsiz jumysyn qamtamasyz etýdegi óz úlesińdi sezingen saıyn ortaq istiń mańyzyn tereńirek túsine bastaısyń, — deıdi Shynar Qumarova.
Ol búginde jınaqtalǵan tájirıbeni saqtap qana qoımaı, ony Teleradıokeshenniń keleshegin qalyptastyratyn jas mamandarǵa jetkizýdiń de erekshe mańyzdy ekenin aıtýda.
Bolashaqqa baǵdar
Medıaholdıngtiń keleshegi týraly sóz qozǵaǵan Shynar Qumarova jańa tehnologııalar medıa salasyn odan ári ózgertetinine senimdi. Alaıda qandaı ózgeris bolsa da, sapa, shynaıylyq jáne qoǵam aldyndaǵy jaýapkershilik sekildi basty qaǵıdattar ózgerissiz qalmaq.
Onyń pikirinshe, Teleradıokeshenniń bolashaǵy úzdiksiz damýmen, tehnologııalyq jańarýmen jáne qalyptasqan qundylyqtardy saqtaı bilýmen tyǵyz baılanysty.
— Teleradıokeshendegi eńbek jolyn endi bastap jatqan jas áriptesterime eń aldymen óz isin shyn júrekten súıýdi tiler edim. Ózgeriske beıim, batyl ári izdenimpaz bolyńyzdar. Sonda bul ujymdaǵy eńbek joly kásibı ómirlerińizdegi eń jarqyn kezeńderdiń birine aınalady. Óz jumystaryńyzǵa tek mindetti oryndaý dep emes, el tarıhyn jasaýǵa qosylǵan úles retinde qarańyzdar, — dep túıindedi Shynar Qumarova.
Aıta keteıik, QR Prezıdentiniń Teleradıokesheni — Qazaqstandaǵy eń iri medıakompanııalardyń biri. Ol kontent jasaý, óńdeý jáne taratý jumystaryn tolyqtaı ózi atqarady jáne ony teledıdar, radıo, ınternet sııaqty barlyq platformalarda usynady. Búginde Teleradıokeshen quramyna: Jibek Joly respýblıkalyq telearnasy men radıosy, Silk Way, Silk Way Cinema, Silk Way Prime halyqaralyq telearnalary, «Kazinform» halyqaralyq aqparat agenttigi jáne Derekti kıno ortalyǵy kiredi.
Buǵan deıin qazaqstandyq telejýrnalıstıka ardageri Keńesbaı Ábenov TRK-nyń tehnıkalyq negizi qalaı qurylǵanyn áńgimelegen edi.
Sondaı-aq, TRK-niń tehnıkalyq dırektsııasynyń basqarýshy dırektory Ernar Ibragımov Teleradıokeshenniń damý kezeńderi men tehnologııalyq jańǵyrýy týraly aıtyp berdi.
