Shyn máninde janashyr urpaq qana eldiń kórkeıýine mol úles qosa alady — Toqaev
TÚRKІSTAN. KAZINFORM — Memleket basshysy Qasym-Jomart Toqaev Túrkistan oblysynyń jurtshylyǵymen kezdesýde sóz sóılep, elimizdiń keleshegi — otanshyl, jasampaz, jaýapkershiligi mol jastardyń qolynda ekenin aıtty, dep habarlaıdy Aqordanyń baspasóz qyzmeti.
Prezıdenttiń sózinshe, Qazir Túrkistan oblysynda 700 myńǵa jýyq jas azamat turady. Bul — turǵyndardyń úshten biri degen sóz.
— Kıeli ordanyń tarıhy qandaı tereń bolsa, bolashaǵy da sondaı jarqyn bolady dep senimdi túrde aıtýǵa bolady. Osy kóp jas azamattarymyz turatyn jerde taǵy da mynadaı sózimdi aıtqym keledi: men Prezıdent retinde elimizdiń jastaryna, olardyń bilimine, qabiletine, kúsh-qýatyna zor úmit artamyn. Elimizge jany ashıtyn, ıaǵnı shyn máninde janashyr urpaq qana Qazaqstannyń kórkeıýine mol úles qosa alady. Elimizdiń keleshegi — otanshyl, jasampaz, jaýapkershiligi mol jastardyń qolynda. Bul da aqıqat desek, oryndy bolar. Naǵyz otanshyl azamat degenimiz, bul — eń aldymen óz jumysyn adal oryndap, adal eńbek etip jatqan adam. Adal eńbekpen kelgen tabys berekeli bolady. Jalqaý, erinshek adam eshqashan otanshyl azamat bola almaıdy. Qoǵamymyzǵa jalań uran, bos áńgime, qurǵaq ýáde, qyzyl sóz kerek emes, naqty is qajet. Otanshyldyq degenimiz ádemi sóz sóılep, jurt aldynda keremet bolyp kóriný emes, bul — eń aldymen elge paıda ákelý, Otanǵa degen adaldyqty naqty ispen kórsetý, — dedi Memleket basshysy.
Budan buryn Memleket basshysy el qoldaýyna ıe bolǵan naǵyz Halyq Konstıtýtsııasy tuǵyryna qonǵanyn alǵa tartty.
