Shymkenttiń sý sharýashylyǵy nysandary memleket menshigine qaıtaryldy
ShYMKENT. KAZINFORM – Shymkenttegi strategııalyq mańyzy bar sý sharýashylyǵy nysandary sot arqyly memleket menshigine qaıtaryldy. Bul sheshim Joǵary aýdıtorlyq palatanyń usynymy negizinde qabyldandy.
Joǵary aýdıtorlyq palata ótken jyldyń jeltoqsan aıynda sý burý salasyndaǵy bıýdjet qarajaty men aktıvteriniń paıdalanylý tıimdiligine memlekettik aýdıt júrgizdi. Aýdıt barysynda Shymkenttiń strategııalyq mańyzy bar sý sharýashylyǵy nysandary jeke menshikte ekeni anyqtaldy. Bul Sý kodeksi talaptaryna buzady.
Osyǵan baılanysty Úkimetke atalǵan obektilerdi zańnama normalaryna saı memleket menshigine qaıtarý boıynsha sharalar qabyldaý usynyldy.
— Nátıjesinde Shymkent qalasynyń mamandandyrylǵan aýdanaralyq ekonomıkalyq soty qala ákiminiń talap-aryzyn qanaǵattandyrdy. Jeke menshik JShS men Ońtústik Qazaqstan oblysynyń memlekettik múlik jáne jekeshelendirý komıteti (quqyqtyq murageri — Túrkistan oblysynyń memlekettik múlik jáne jekeshelendirý departamenti) arasynda jasalǵan satyp alý-satý sharty jaramsyz dep tanyldy, — delingen Joǵary aýdıtorlyq palatanyń baspasóz qyzmeti habarlamasynda.
Memlekettik aýdıttiń qorytyndysy boıynsha berilgen Joǵary aýdıtorlyq palatanyń basqa da tapsyrmalary men usynymdarynyń oryndalýy baqylaýda bolady.
Qazaqstan ekonomıkasyn demonopolızatsııalaý boıynsha keshendi jumys Memleket basshysy Qasym-Jomart Toqaevtyń tapsyrmasyna sáıkes 2022 jyldan beri júrgizilip keledi. Osy ýaqyt aralyǵynda bul sharalar munaı jáne munaı ónimderi, tabıǵı gaz, elektr energııasy, temirjol kóligi, azamattyq avıatsııa, qoǵamdyq kólik, telekommýnıkatsııa jáne basqa da naryqtardy qamtydy.
Aıta ketelik BQO-da quny 53 mln teńge turatyn 10 turǵyn úı memlekettik menshikke tirkelmegeni jóninde jazǵan edik.