Shymkenttiń mıllıonynshy turǵyny Aısulý jeti jasqa tolady
ShYMKENT. KAZINFORM — 2018 jyly Aısulý Elamanova Shymkenttiń mıllıonynshy turǵyny retinde tarıhqa endi.

Aısulý búginde birinshi synypta oqıdy. Sabaǵy jaqsy, kúndeligi kileń «beske» tola. Synypta da qatarlastarynyń aldy.
— Oqýǵa degen yntasy joǵary. Kishkentaı bolsa da kóp izdenedi. Úı tapsyrmasyn oryndap qana qoımaı — zertteıdi, tájirıbe jasaıdy, suraqtar qoıady. Ásirese matematıkaǵa qatty qyzyǵady, — deıdi synyp jetekshisi.

Oqýshynyń kún tártibi muqııat josparlanǵan. Bos ýaqyty joq. Mektepten keıin basseınge júzýge barady, odan soń, bı úıimesi men gımnastıkaǵa qatysady.
— Jaqynda qyzym júzýden qalalyq jarysta altyn medal jeńip aldy. Ne istese de, júregimen isteıdi, — deıdi anasy Aıjan Ahaıbekova.

Qalanyń mıllıonynshy turǵynynyń dúnıege kelý oqıǵasy bólek áńgime. Anasynyń aıtýynsha, bosaný 16 mamyrda tabıǵı jolmen josparlanǵan. Biraq náreste durys ornalaspaǵandyqtan, kesar tiligin jasaý kerek bolypty. Dál osy kún — 17 mamyr — Aısulýdyń týǵan kúni jáne Shymkentke megapolıs mártebesi berilgen kún boldy. Sondaı-aq, otbasy úshin de qýanyshqa toly kún retinde este qaldy. Tar páterde kúneltip kelgen segiz adam birden eki bólmeli keń baspanaǵa qol jetkizdi. Ol kezde Aısulýdyń ata-anasy 21-ge tolǵan jas otbasy bolatyn.

— Bilesiz be, men Aısulýdyń erekshe qyz ekenin birden túsindim. Onyń qulaǵynda kishkentaı belgi bar, bul erekshe balalardyń belgisi dep sanalady. Onyń ústine onyń dúnıege kelýi musylmandardyń qasıetti Ramazan aıynyń birinshi kúnine tuspa-tus keldi. Biraq, shynymdy aıtsam, taǵdyr bizge mundaı syı daıyndaǵanyn elestete de almadym, — dep sol kúnderdi eske alady Aıjan.
Aıta keteıik, budan buryn Túrkistan oblysynda dúnıege kelgen úshemderge Muhammed, Mahmud, Ahmet esimderi qoıylǵanyn jazǵan bolatynbyz.