Shymkenttiń burynǵy HQKO basshysynyń tergeý kezindegi ólimine ne sebep boldy - mamandar

ShYMKENT. KAZINFORM-Shymkentte №2 arnaıy HQKO-nyń burynǵy basshysy Jomart Mýrashımov kóz jumdy. Ol júrgizýshi kýálikterin zańsyz berý isimen aınalysqan uıymdasqan qylmystyq top qurý deregi boıynsha tergeýde bolǵan.

Kazinform agenttiginiń resmı saýalyna oraı Shymkent qalasy Densaýlyq saqtaý basqarmasy Mýrashımovtyń tergeý barysynda qamaýda otyrǵan kezinde profılaktıkalyq tekserýlerden ótip, salalyq mamandardyń keńesin alǵanyn habarlady.

— Júrgizilgen tekserýler men qaraýlardyń nátıjesinde onyń boıynan mynadaı sozylmaly aýrýlar anyqtaldy: arterııalyq gıpertonııa, bronh astmasy, osteohondroz. Ol qajetti dári-dármektermen qamtamasyz etildi, — dep habarlady vedomstvo.

18 tamyz kúni tergeýdegi azamattyń jaǵdaıy kúrt nasharlaǵan: arterııalyq qysymy 240/120 deıin kóterilip, mı qan aınalymynyń jedel buzylýy belgileri tirkelgen. Jedel járdem brıgadasy ony №1 qalalyq klınıkalyq aýrýhananyń qabyldaý bólimine jetkizip, «Mı qan aınalymynyń buzylýy (gemorragııalyq túri)» dıagnozymen neıroreanımatsııa bólimine jatqyzdy.

- Tolyq kólemde medıtsınalyq kómek kórsetilgenine qaramastan, 19 tamyz kúni saǵat 10:46-da tergeýdegi Mýrashımovtyń bıologııalyq ólimi tirkeldi. Ólim sebebi: jedel júrek-qantamyr jetkiliksizdigi, kóp aǵzanyń jetkiliksizdigi, — dep qosty Densaýlyq saqtaý basqarmasyndaǵylar.

Atalǵan derek boıynsha materıaldar quqyq qorǵaý organdarynyń biryńǵaı tirkeý reestrine engizildi. Medıtsına qyzmetkerlerine qatysty tekserý júrgizilip jatyr, onyń nátıjesinde tıisti sheshim qabyldanatyn bolady.

Al, Mýrashımovtyń múddesin qorǵaǵan advokat Talǵat Esimov aıyptalýshynyń densaýlyǵynyń nasharlaǵanyn dáleldeıtin barlyq medıtsınalyq qujattardy sotqa tapsyrǵanyn málimdedi.

Aıta keteıik, budan buryn Rýslan Berdenovtyń isine qatysty sot Ernar Jıembaıdy 9 jylǵa bas bostandyǵynan aıyrǵanyn jazǵan bolatynbyz.