Shymkenttiń bas dárigeri patsıenttiń ákesiniń ústinen sotqa shaǵym túsirgen
ShYMKENT. KAZINFORM. Shymkent qalalyq Densaýlyq saqtaý basqarmasynyń basshysy Nurlybek Asylbekov medıtsınalyq uıymdardyń birine kelgen naýqastyń ákesiniń ústinen sotqa shaǵym túsirgen. Qalanyń bas dárigeriniń aıtýynsha, er adam ınternet jelisi arqyly jala japqan.
Densaýlyq saqtaý salasyndaǵy sybaılas jemqorlyqtyń aldyn alý sharalary boıynsha ótken brıfıngte Nurlybek Asylbekov qalada medıtsına salasy boıynsha aryz-shaǵym túsirýshiler sany artqanyn ashyp aıtty.
«Kemshiligimiz bar. 2022 jylmen salystyrǵanda bizde aryz-shaǵym kóbeıgen. Medıtsınalyq jáne farmatsevtıkalyq baqylaý departamentiniń málimetine sáıkes, byltyr 26 paıyzǵa ósken. Árıne, muny bárimiz jumyla azaıtýymyz kerek. MÁMS arqyly da monıtorıng jasalynyp otyrady. Soǵan qatysty da shaǵymdardy azaıtý maqsatynda jumys jasap jatyrmyz», - dedi Densaýlyq saqtaý basqarmasynyń basshysy.
Spıkerdiń sózinshe, qalada kóbine medıtsınalyq qyzmet kórsetý sapasyna qatysty shaǵymdar túsedi. Keı jaǵdaıda patsıentter Densaýlyq saqtaý mınıstrligi bekitken buıryqqa sáıkes taǵaıyndalǵan em-domǵa qaramastan «aýrýhanada dári-dármek tapshy» dep aryzdanyp jatady eken. Sáıkesinshe olardyń shaǵymdary negizsiz ekeni anyqtalady.
Al sybaılas jemqorlyqqa qatysty shaǵymdardyń kóbi rastalmaǵan. Máselen, byltyr jemqorlyq boıynsha 6 shaǵym túsken. Quzyrly organdar júrgizgen jumystardyń nátıjesinde olardyń tek bireýi rastalypty. Ústinen shaǵym túsken dáriger jumystan shyǵarylǵan.
«Meniń ústimnen de negizsiz jala aıtylyp, sotqa shaǵym túsirýime týra keldi. Bir naýqastyń ákesi kórsetilgen qyzmet sapasyna shaǵymdanyp, medıtsına uıymyndaǵy máseleni jemqorlyqpen baılanystyrǵan. Al meni ondaǵylardyń bul áreketin kóre-tura jyly jaýyp otyr dep ınternet jelisinde aqparat taratqan. Anyqtaı kele, ol mekemede eshqandaı sybaılastyq anyqtalmady. Maǵan qatysty da aıtylǵan aqparat negizsiz bolǵandyqtan ar-ojdanyma nuqsat keltiredi dep sotqa shaǵym túsirdim», - dedi spıker.
Brıfıngte densaýlyq saqtaý salasyndaǵy sybaılas jemqorlyqpen kúrestegi negizgi quraldarynyń biri ashyqtyq ekenin alǵa tartqan basqarma basshysy qarjylandyrý kózinde ashyq portal arqyly jumys isteıtinin jetkizdi. Búginde qaladaǵy medıtsına uıymdary arasynda jalpy densaýlyq saqtaý salasyndaǵy jemqorlyqqa ákeletin faktorlardy aldyn alý maqsatynda 11 joba qolǵa alynyp, 5-joba pılottyq rejım negizinide júrgizilip jatyr.
Aıta keteıik, Shymkent qalasynyń densaýlyq saqtaý uıymdarynda jalpy 28 komplaens ofıtserleri turaqty túrde jumys júrgizip jatyr. Olar Sybaılas jemqorlyqqa qarsy agenttiktiń buıryǵyna sáıkes kvazımemlekettik sektor sýbektilerindegi sybaılas jemqorlyqqa qarsy bekitilgen erejemen jumys isteıdi. Maqsat – jemqorlyqty dárigerler nemese patsıenttermen sóılese otyryp anyqtaý jáne onyń aldyn alý.
