Shymkenttiń bas dárigeri órtten zardap shekkenderdiń jaǵdaıy týraly aıtty

ShYMKENT. KAZINFORM – Shymkentte «Ordabasy»  ındýstrııaldy aımaqtaǵy órtten zardap shegip, aýrýhanaǵa túsken eki naýqastyń jaǵdaıy belgili boldy. 

Densaýlyq saqtaý basqarmasynyń basshysy Nurlybek Asylbekovtyń aıtýynsha, tótenshe jaǵdaı kezinde jedel járdem qyzmeti, sonymen qatar evakýatsııalyq ortalyqtarda dárigerler júıeli jumys atqarǵan. Der kezinde kórsetilgen medıtsınalyq kómektiń nátıjesinde aýyr halge túsken naýqastar tirkelmegen. Oqıǵa bolǵan aýmaqta 10 jedel járdem brıgadasy kezekshilik etken. 

«Tótenshe jaǵdaı barysynda barlyq aýrýhana jáne emhana shtattyq rejımde jumys istedi. Oqys jaǵdaı saldarynan aýrýhanaǵa túsken eki naýqastyń qazirgi jaǵdaıy jaqsy. Dárigerlerdiń baqylaýyna alyndy. Alańdaýǵa negiz joq», - dedi qalanyń bas dárigeri.

Basqarma basshysynyń aıtýynsha, aýrýhanaǵa jatqyzylǵan naýqastyń biri búgin-erteń úıine shyǵarylady. 

Eske salsaq, Shymkentte ındýstrııaldy aımaqtaǵy KMG Supple Company JShS aýmaǵynda tehnıkalyq gaz qabyrshaqty kúkirt janyp, órtke ulasty. Oqıǵa saldarynan 10 adam medıtsınalyq kómekke júgingeni týraly buǵan deıin jazdyq. 

Al, turǵyndar qalada órtten keıin jaǵymsyz ıis shyqqanyn aıtyp shaǵymdandy. Olardyń tynys alýy qıyndap, ózderin jaısyz sezingen.