Shymkenttikter sábıge qandaı esimderdi kóp qoıady

ShYMKENT. KAZINFORM — Adııa-Begim, Medına jáne Safına esimderi qyz balalar arasynda úzdik úshtikke engen.

Shymkent qalasy boıynsha «Azamattarǵa arnalǵan úkimet» fılıaly jańa týǵan nárestelerge qoıylatyn eń tanymal esimderdiń reıtıngin jasady. Qyz balalar arasynda úzdik úshtikke Adııa-Begim, Medına jáne Safına esimderi kirse, ul balalar arasynda Aqjúrek, Balmeıir jáne Murager esimderi eń kóp qoıylǵan.

Jyl basynan beri Shymkent qalasynda 3 myńnan astam ata-ana týý týraly kýálikti onlaın formatta rásimdese, 958 ótinim HQKO arqyly berilgen. Al ótken jyly HQKO arqyly 10 myńnan astam nárestege týý týraly kýálik berilgen bolsa, 36 myńnan astam qujat onlaın formatta rásimdelgen.

— Onlaın qyzmetterdiń engizilýi týý týraly kýálikti alý protsesin edáýir jeńildetti. Búginde ata-analar qujatqa ótinishti proaktıvti túrde, sondaı-aq, ekinshi deńgeıli bankterdiń mobıldi qosymshalary arqyly da bere alady. Sonymen qatar, qyzmetti dástúrli tásilmen — HQKO arqyly alý múmkindigi de saqtalǵan. Bul memlekettik qyzmet tegin kórsetiledi, — dedi AHAT basqarma basshysy Aqbota Karnakbaeva. 

Sondaı-aq, Shymkentte týý týraly kýálikti saltanatty túrde tabystaýǵa arnalǵan «Saltanat zaly» jumys isteıdi. Munda AHAT qyzmetkerleriniń qatysýymen balanyń alǵashqy qujatyn merekelik jaǵdaıda tapsyrý rásimderi qarastyrylǵan.

Aıta keteıik, budan buryn 2040 jyly Túrkistan qalasynyń halqy 400 myńǵa jetetinin jazǵan bolatynbyz.