Shymkenttikter Respýblıka kúnin atap ótti
ShYMKENT. KAZINFORM – Respýblıka kúni qarsańynda Shymkent qalasynda Qazaqstannyń ulttyq merekesine arnalǵan saltanatty is-shara ótti. Merekelik keshke qala ákimi Ǵabıt Syzdyqbekov, memlekettik organdardyń, qoǵamdyq uıymdardyń ókilderi men eńbek ujymdarynyń músheleri qatysty.
Qala ákimi kópshilikti Respýblıka kúnimen quttyqtap, kásibı qyzmetinde erekshelengen, eldiń damýyna eleýli úles qosqan azamattarǵa Qazaqstan Respýblıkasy Prezıdentiniń atynan memlekettik nagradalar tabystady.
Megapolıs basshysy merekeniń tarıhı mańyzyna toqtalyp ótti. 1990 jylǵy 25 qazanda Memlekettik egemendik týraly deklaratsııanyń qabyldanýy Qazaqstan memlekettiliginiń qalyptasýyndaǵy mańyzdy kezeń bolyp, elimizdiń Táýelsizdikke qaraı jasaǵan qadamdaryna jol ashty.
– Bıyl bul mereke Qazaqstannyń jańa tarıhı belesi – Táýelsizdiktiń 35 jyldyǵymen tuspa-tus kelip otyr. Egemendik pen eldiktiń negizderin saqtaý jáne nyǵaıtý – árqaısymyzdyń ortaq mindetimiz, – dedi Ǵabıt Syzdyqbekov.
Qala ákimi, sonymen qosa, elimizde jalpy ulttyq referendým qorytyndysy boıynsha qabyldanǵan jańa Konstıtýtsııa negizinde saıası jáne qoǵamdyq jańarý úderisteri jalǵasyp jatqanyn atap ótti. Ata zań memlekettik basqarý júıesin jetildirýge, ádildik pen zań ústemdigin nyǵaıtýǵa negiz boldy.
Shymkenttiń damýy týraly sóz qozǵaǵan qala ákimi megapolıstiń jetistikterine turǵyndardyń qosyp otyrǵan úlesiniń mańyzyn atap ótti. Búginde qalanyń ekonomıkalyq áleýeti artyp, ınvestıtsııalar jumyldyrýda, ınfraqurylymdy jetildirip, bilim, mádenıet jáne sport salalaryndaǵy múmkindikteri keńeıip keledi. Bul baǵyttar halyqtyń ómir súrý sapasyn arttyrýǵa jáne qalanyń odan ári damýyna yqpal etedi.
Saltanatty is-shara «Búgingi Qazaqstan» atty mýzykalyq-teatrlandyrylǵan qoıylymmen jalǵasyp, merekelik kontserttik baǵdarlamamen qorytyndylandy.
