Shymkenttik jaýyz emshige 6 balany asyrap alýǵa kim ruqsat bergen

ASTANA. KAZINFORM — Shymkenttik emshi asyrap alǵan 6 balasyn qorlap, azaptady degen kúdikpen qamaýda otyr. Balalardyń eldiń túrli qalalarynan asyrap alynǵany belgili boldy.

Emshiniń qatygez áreketi uzaq ýaqyt boıy qalaısha ashylmaǵany, balalardy qandaı negizde asyrap alǵany ázirge belgisiz. 

Buǵan deıin ógeı ákeniń 2021 jyly asyrap alǵan 6 balany qorlyqta ustaǵany týraly derek taraǵan.

Balalardyń úlkeni ógeı ákeniń olardy ash ustap, mysyq pen ıttiń etimen ǵana azyqtandyrǵanyn aıtyp, kómek suraǵan. 

Tekserýshiler atalmysh úıden las jaǵdaıda ómir súrip jatqan, ábden azyp-tozǵan, denesinde kógergen, qyzarǵan iz bar balalardy tapqan. 

«Kóz aldymyzdaǵy kórinisten eseńgirep qalǵandaı boldyq. Balalar azyp-tozǵan, deneleri kógergen, kútimsiz, las. Ol úıge tutas komıssııa bolyp barǵanbyz. Jaǵdaıda kórgen sátte-aq balalardy ýaqytsha bolsa da asyraýshydan alyp qoıý kerektigin túsindik. Olardy onda qaldyrý qaýipti edi. Ár balanyń ústinde qos qabattan kir sińgen kıim boldy. Beseýi tipti sóıleı almaıdy dese de bolady. Balalardyń denesindegi kógergen izderdi ata-anasy oınap júrip túsirgen shyǵar dep túsindirmek boldy», — deıdi Shymkent qalasyndaǵy bala quqyqtary jónindegi ýákil Janneta Jazyqbaeva. 

Onyń málimeti boıynsha, bala asyrap alǵan erli-zaıyptynyń óz kindiginen náreste joq kórinedi. 3-ten 15 jasqa deıingi aralyqtaǵy 6 balany Shymkent, Almaty, Astana, Óskemen qalalaryndaǵy túrli balalar úıinen jınap alǵan. Altaýdyń ishindegi bir qyz ben ul ǵana resmı asyrap alynǵan. Qalǵanyna qamqorlyq rásimdegen. 

«Keleshekte taǵy birneshe balany balalar úıinen asyrap alýdy josparlaǵan», — deıdi Janneta Jazyqbaeva. 

Otaǵasy ózin halyq emshisi dep ataıdy. YouTube-tegi arnasynda birneshe júz oqyrmany bar. (Kazinform sot úkimine deıin kúdiktiniń derekterin jarııalaı almaıdy).

Balalardyń múshkil halin, úıdegi jaǵdaılary tıisti deńgeıde emestigin kórshileriniń de, muǵalimderi men sol aýmaqqa jaýapty ýchaskelik polıtseıdiń de habarlamaǵany suraq týdyrady. 

Qazir 6 balanyń ekeýi kámeletke tolmaǵandardyń beıimdeý ortalyǵynda. Qalǵan tórteýi bóbekter úıinde. Al ógeı ákeniń ústinen birneshe bap boıynsha qylmystyq is qozǵalǵan. 

«Іs qylmystyq ister jónindegi sotta jatyr. Birneshe bap boıynsha aıyp taǵylyp otyr. Onyń ishinde «azaptaý» baby da bar. Balalardy asyrap alǵan er adam qamaýda», — dep málim etti Shymkent qalasynyń polıtsııa departamenti. 

Jaǵa ustatarlyq oqıǵa týraly bala quqyqtary jónindegi ýákil Dınara Zákıeva da pikir bildirdi. 

«Shymkenttegi asyrandy balalardy azaptaý faktisi boıynsha aıtsaq, atalǵan qylmys boıynsha aqpan aıynda Іshki ister mınıstrligimen birge jumys istegen bolatynbyz. Ol istiń mán-jaıynda qorqynyshty jaıttar jeterlik. Balalardyń úlkeniniń aıtýynsha, olarǵa zár men nájis jegizgen. Іs sotqa joldandy. Sondaı-aq, balalardyń úlkeniniń jınaǵyndaǵy aqshanyń jumsalýyna qatysty is tergelip jatyr. Onyń aqshasyna eshki satyp alyp, uldyń ózine baqtyryp qoıǵan bolýy múmkin», — Dınara Zákıeva.

Ombýdsmen balalardyń denesindegi kógergen izderge mán bermegen pedagogter men qamqorlyq organdarynyń ókilderinen de jaýap alynǵanyn aıtady. 

«Olardyń ústinen de qylmystyq is qozǵaldy. Tergeý júrip jatyr. Bul sońǵy birneshe aıda bala asyrap alǵan úılerde tirkelgen tórtinshi azaptaý faktisi. Osyǵan baılanysty Prezıdent ákimshiligi búkil óńirlerdegi ákimdiktermen jınalys ótkizip, nátıjesinde naýryz aıynan beri bala asyrap alǵan otbasylardyń bárinde reıd júrgizilip jatyr, shildede bitýi kerek», — dedi ombýdsmen. 

Kazinform agenttigi osy is boıynsha qamqorlyq organdary men bilim berý mekemelerine, polıtsııaǵa saýal joldady.