Shymkenttik kelinshek satýǵa daıyndap qoıǵan 20 paket mefedronmen ustaldy
Shymkent turǵynynan satýǵa daıyndalǵan 20 paket sıntetıkalyq esirtki tabyldy, dep habarlaıdy Kazinform.
Kúdikti kelinshekti Túrkistan oblysy polıtsııa departamentiniń esirtki qylmysyna qarsy is-qımyl basqarmasynyń qyzmetkerleri Saryaǵash qalasynan ustady.
Tekserý kezinde onyń syrt kıiminiń qaltasynan ishinde untaq tárizdi esirtkige uqsas zaty bar 18 paket tabyldy.
Al úıin tintý barysynda sıntetıkalyq esirtkige uqsas zaty bar 2 paket jáne elektrondy tarazy men basqa da aıǵaqtar tárkilendi.
Zertteý qorytyndysyna sáıkes tárkilenip alynǵan zat — salmaǵy 20 gramnan asatyn «mefedron» sıntetıkalyq esirtkisi bolyp shyqty.
«Atalǵan jaıt QR QK 297-baby boıynsha tirkeldi. Qazirgi tańda sotqa deıingi tergeý amaldary júrip jatyr. Oqıǵanyń tolyq mán-jaıyn tártip saqshylary anyqtaıdy. Kúdikti qamaýda» delingen Túrkistan oblysy polıtsııa departamentiniń baspasóz qyzmeti taratqan aqparatta.
