Shymkenttik sheneýnikti jıyn ústinde ustap áketý ákimniń ıdeıasy bolatyn - Antıkor
ASTANA. KAZINFORM – Sybaılas jemqorlyqqa qarsy is-qımyl agenttigi preventsııa qyzmetiniń basshysy Saıan Ahmetjanov shymkenttik sheneýniktiń ákimdik jıynynda tutqyndalýy týraly pikir bildirdi.
«Shymkent ákimi qatysyp otyrǵan jıyn ústinen taraǵan kórinisti qazaqstandyqtar qyzý talqylap jatyr. Sybaılas jemqorlyqqa qarsy qyzmet spektaklge aınalyp barady dep oılamaısyz ba?» dep surady jýrnalıst.
Agenttik ókili bul oqıǵa vedomstvoda qaralǵanyn aıtty.
«Atalǵan oqıǵany qaradyq. Sybaılas jemqorlyqqa qarsy qyzmet búkil jerde ashyq jumys istep keledi. Tergeý organdary jiberetin shaqyrýdyń kez kelgeni maquldaý arqyly iske asady. Osy turǵydan alsaq, aýmaqtyq organymyz bul jaǵdaıdy jergilikti atqarýshy organnyń basshysy – ákimmen birlesip maquldanǵan. Bul qala ákiminiń bastamasy bolsa kerek», - dedi Saıan Ahmetjanov.
Eske salsaq, áleýmettik jelide Shymkent qalasynyń ákimi jıyn ústinde qolastyndaǵy sheneýnikti sybaılas jemqorlyqqa qarsy qyzmet ókilderine ustatyp jibergeni týraly vıdeo taraǵan bolatyn.
Basqarma bastyǵy seısmıkalyq qaýipsizdikke bólingen 120 mln teńgeni jymqyrdy dep aıyptalyp otyr.
