Shymkenttik komanda AQSh-ta ótken halyqaralyq robototehnıka chempıonatynda jeńimpaz atandy
ASTANA. KAZINFORM — Shymkent–Qarataý NIS mektebiniń OVERTIME komandasy 29 sáýirden 2 mamyrǵa deıin AQSh-tyń Hıýston qalasynda ótken FIRST World Championship 2026 halyqaralyq robototehnıka chempıonatynda Qazaqstan namysyn qorǵady, dep habarlaıdy Kazinform agenttiginiń Vashıngtondaǵy menshikti tilshisi.
Jarysqa búkil álemnen 336 komanda qatysty. Chempıonat qorytyndysy boıynsha Shymkent–Qarataý NIS oqýshylary «Reach Award Winner — 1st Place» júldesin ıelenip, álemdik chempıonattyń mańyzdy nomınatsııalarynyń birinde jeńimpaz atandy.
FIRST Championship robototehnıka, ınjenerııa jáne ınnovatsııalar salasyndaǵy eń bedeldi halyqaralyq jarystardyń biri. Bul týrnırde komandalardyń tek tehnıkalyq daıyndyǵy, robottyń sapasy men baǵdarlamalyq sheshimderi ǵana emes, sonymen qatar jobalyq oılaý qabileti, komandalyq jumys, kóshbasshylyq, STEM-bilimdi damytýǵa qosqan úlesi jáne qoǵamǵa áseri de baǵalanady.
OVERTIME komandasyna berilgen Reach Award júldesi olardyń STEM jáne robototehnıka salasyn nasıhattaý, qaýymdastyqty keńeıtý jáne áleýmettik mańyzdy jobalardy júzege asyrýdaǵy júıeli jumysyn moıyndaý.
Komandanyń basty ereksheligi — qatysýshylar tek jarystyq robototehnıkamen shektelmeıdi. Olar ınjenerlik bilimderin naqty áleýmettik máselelerdi sheshýge paıdalanýǵa umtylady. OVERTIME óz qyzmeti aıasynda birqatar ınklıýzıvti jáne bilim berý bastamalaryn iske asyrdy.
Komanda sonymen qatar kózi kórmeıtin jandarǵa arnalǵan Braıl qarpindegi taktıldi kitap jasap, ony álem boıynsha taratyp, «Úmit» mektebine jetkizdi. Sondaı-aq qatysýshylar estý qabileti buzylǵan adamdarǵa arnalǵan Soyle aqyldy kózildirigin jasap, mektepke deıingi balalarǵa arnalǵan tanymdyq kitaptardy daıyndady.
Barlyq osy jobalar erekshe bilim berý qajettilikteri bar adamdarǵa qoldaý kórsetýge, bilimge qoljetimdilikti arttyrýǵa jáne tehnologııa arqyly jańa múmkindikter jasaýǵa baǵyttalǵan. Komandanyń jumysy STEM salasy tek jarys alańy ǵana emes, qoǵamǵa naqty kómek kórsetý quraly bola alatynyn dáleldeıdi.
OVERTIME komandasynyń FIRST World Championship 2026 chempıonatynda jeńiske jetýi tek Shymkent–Qarataý NIS mektebi úshin ǵana emes, búkil Qazaqstan úshin de mańyzdy jetistik boldy.
Eske salaıyq, birneshe kún buryn qazaqstandyq stýdentter ázirlegen JI jobasy Nıý-Iorkte jeńiske jetken bolatyn.
