Shymkenttik emshi asyrap alǵan egiz elordaǵa qaıtarylady
ASTANA. KAZINFORM – Shymkent turǵyny qamqorlyǵyna alǵan 6 balanyń arasynda egiz de bar. Ul men qyz 2021 jyldyń 26 mamyrda elordada dúnıege kelgen. Emshi olardy úsh aılyq kezderinde baýyryna basqan. Qamqorlyqqa berilgen egiz sábıdiń taǵdyryna qatysty istiń mán-jaıyn Astana qalalyq Bilim basqarmasynan surap bildik.
«Bala asyrap alýǵa, qorǵanshylyqqa nemese patronattyq tárbıege alýǵa nıet bildirgen azamattardy esepke alýdy úmitkerdiń turǵylyqty jeri boıynsha Bilim basqarmalary júrgizedi. Azamat (shymkenttik emshi – red.) 2021 jylǵy 9 sáýirden bastap Shymkent qalasynyń qorǵanshylyq jáne qamqorshylyq organdarynda bala asyrap alýǵa (qorǵanshylyqqa) úmitker retinde esepte tur. Qorǵanshylyqqa úmitker bolý múmkindigi týraly oń qorytyndy alǵannan keıin, ol azamat Shymkent qalasy qorǵanshylyq jáne qamqorshylyq organymen jetim balalardyń respýblıkalyq derekter bankinde tirkeldi. Osydan keıin derekter bankindegi balalar týraly aqparatqa qol jetkizdi», - deıdi Astana qalalyq Bilim basqarmasy basshysynyń orynbasary Serik Ádilbaev.
Balalardy qorǵanshylyqqa berý rásimi QR Bilim jáne ǵylym mınıstriniń 2020 jylǵy 24 sáýirdegi №158 buıryǵymen bekitilgen «Jetim balaǵa (balalarǵa) jáne ata-anasynyń qamqorlyǵynsyz qalǵan balaǵa (balalarǵa) qamqorshylyq nemese qorǵanshylyq belgileý» memlekettik qyzmet kórsetý qaǵıdalaryna sáıkes júrgizilgen. Osylaısha, Shymkent turǵyny qajetti barlyq qujatty usyna otyryp, Astana qalasy Bilim basqarmasynyń 2021 jylǵy 18 tamyzdaǵy №436 buıryǵy negizinde 2021 jylǵy 26 mamyrda týǵan egiz sábıdi qamqoryna alǵan.
«Balalar Astanadan esepten shyqqannan keıin, Astana qalasynyń Bilim basqarmasy 2021 jylǵy 19 tamyzda Shymkent qalasyna balalardy esepke qoıyp, odan ári baqylaýdy júzege asyrý maqsatynda, aqparattyq hat joldady», - deıdi Serik Ádilbaev.
Buǵan deıin jazǵanymyzdaı, Arnaıy komıssııa akt toltyryp, «ógeı áke tarapynan jaýyzdyq kórdi delingen» balalardy 13 aqpanda bul otbasynan alyp ketken. Qazir ekeýi kámeletke tolmaǵandardy beıimdeý ortalyǵynda, qalǵan tórteýi bóbekter úıinde.
«Shymkent qalasy Bilim basqarmasynyń hatyna sáıkes, qazir eki kámeletke tolmaǵan bala (Astanadan ketken egiz bala – red.) Shymkent qalasynyń balalar úıinde. Qorǵanshyǵa qatysty sot aktisi shyǵarylǵannan keıin, balalar Astana qalasyna qaıtarylady jáne olar balalar úıine ornalastyrylady», - deıdi basqarma basshysynyń orynbasary.
Eske salsaq, Shymkenttik emshi asyrap alǵan 6 balasyn qorlap, azaptady degen kúdikpen qamaýda otyrǵany týraly habarlaǵan edik. Ol asyrap alǵan balalaryna ıt pen mysyqtyń etin jegizdi degen derek shyqty.
Osy oqıǵaǵa baılanysty bilim salasynyń birqatar qyzmetkeri jazalandy. Sonymen qatar qalalyq densaýlyq saqtaý basqarmasyndaǵylar balalardyń qazirgi jaǵdaıy týraly aıtyp berdi.
Sondaı-aq balalardyń eldiń birneshe qalasynan asyrap alynǵany belgili boldy.
Balalardyń biriniń ájesi Óskemende turady. Kazinform tilshisi 65 jastaǵy Natalıa Ýstınovamen jolyǵyp, jıen nemeresiniń asyraýǵa qalaı berilgenin surap kórdi.
Al Shymkenttegi balalar úıiniń basshysy emshiden qorlyq kórgen oqýshy týraly aıtyp berdi.
Birer kún buryn osy balalarǵa qamqorlyq emes, qorlyq kórsetti dep aıyptalyp jatqan emshiniń isin qaraıtyn sýdıa belgili boldy.
