Shymkenttik emshi asyrap alǵan astanalyq egiz – tastandy
ASTANA. KAZINFORM – Shymkenttiń turǵyny egiz sábıdi qamqorlyǵyna alýǵa qatysty qujattardy tapsyryp, baýyryna basqan.
«Balalar 2021 jylǵy 2 shildede «Densaýlyq saqtaý uıymynda balany tastap ketý» týraly akt negizinde Astana qalasynyń mamandandyrylǵan balalar úıine tústi», - dep túsindirgen Astana qalalyq Bilim basqarmasy basshysynyń orynbasary Serik Ádilbaev Kazinform agenttigi joldaǵan saýal jaýabynda.
Basqarma basshysynyń orynbasary, tastandy egizdiń sol kezdegi densaýlyq jaǵdaıyna qatysty málimetpen bólise almaıtynyn aıtty.
«Halyq densaýlyǵy jáne densaýlyq saqtaý júıesi týraly» QR Kodeksiniń 273-babyna sáıkes, medıtsınalyq kómekke júginý faktisi, adam densaýlyǵynyń jaı-kúıi, onyń aýrýynyń dıagnozy týraly aqparat jáne ony zerttep-qaraý jáne emdeý kezinde alynǵan ózge de málimetter medıtsınalyq turǵydan qupııa bolyp sanalady. Osyǵan baılanysty egiz sábıdiń densaýlyq jaǵdaıy týraly málimetterdi usyný múmkin emes», - deıdi ol.
Odan bólek, shymkenttik emshiniń balalardy qorlaǵany jaıly aqparattar tarap, qoǵamdy dúr silkindirgenine qaramastan egiz balany buıryqqa súıenip, bere salǵan elordadaǵy balalar úıinde ishki tekseris júrgizilmegeni aıtyldy.
«Jetim jáne ata-anasynyń qamqorlyǵynsyz qalǵan balaǵa qamqorshylyq nemese qorǵanshylyq belgileý» memlekettik qyzmetin alý úshin, ótinish berýshi Qazaqstan Respýblıkasy Bilim jáne ǵylym mınıstriniń 2020 jylǵy 24 sáýirdegi № 158 buıryǵymen bekitilgen «Otbasy jáne balalar salasynda memlekettik qyzmetter kórsetý qaǵıdalarynyń» 8-tarmaǵynda kózdelgen barlyq qujattardy, onyń ishinde sottylyǵynyń joqtyǵy jáne psıhıatrııalyq dıspanserde esepte turmaıtyny týraly anyqtamalardy usyndy. Osyǵan baılanysty, memlekettik qyzmet kórsetýden bas tartýǵa negiz bolǵan joq», - deıdi bilim basqarmasynan.
Buǵan deıin shymkenttik emshi asyrap alǵan egiz elordaǵa qaıtarylǵany týraly habarlaǵan edik.
Eske salaıyq, emshiniń asyrap alǵan 6 balasyn qorlap, azaptaǵany belgili boldy.
Sonymen birge, Shymkent qalasynyń kámeletke tolmaǵandardyń isteri jónindegi mamandandyrylǵan aýdanaralyq sotynyń 2024 jylǵy 18 maýsymdaǵy jeke qaýlysy qarastyryldy. Jeke qaýlyny qaraý qorytyndysy boıynsha qorǵanshylyq jáne qamqorshylyq organynyń qyzmetkerlerimen júktelgen fýnktsıonaldyq mindetterdi sapaly oryndaý, onyń ishinde memlekettik qyzmetter kórsetý turǵysynan túsindirý jumystary júrgizildi.
